Mizoram, Tripura aser MBDPF den tezüngzüktepba tasen yanglu

New Delhi, Chiteni/July 7 (Agencies): Taruba ita ana tsüngda Bru nunger Mizoram-i meyipa anir arutsüba dak sendakba nung Union Home Minister Rajnath Singh-i tezüngzüktepba tasen ka tembanga yangluogo.
Bru nunger meyipa aotsüba dak sendakba nung Küptoknü linük yimtiba nung Centre, Mizoram aser Tripura sorkar aser Mizoram Bru Displaced People’s Forum (MBDPF) tsüngda tezüngsüktepba ka nung sign süogo.
Iba tezüngzüktepba kübok Mizoram sorkari Bru nunger refugee tem nem mapa agütsütsü aser parnok 32,876 nem state nung district asem kübok talidak agütsütsü züngzüktep.
Bru nunger refugee kibong shia nem sen lakh pezüzü agütsütsü aser küm ana atema ita shi sen 5,000 agütsütsü. Repatriation package nung shilem ka ama refugee tem nem ki asütsü atema sen lakh 1.50 teyari agütsütsü.
Iba den bendenloksema parnok nem küm ana atema ration angati agütsütsü.
Iba jenjang tajung agiba atema tenüngsanga Tripura Chief Minister Biplab Kumar Deb-i, iba ya otsütsü maparenka lir, ta ashi.
“Mizoram nungi Bru nunger refugee tem Tripura nung taoba küm 22 tashi lia arudar, parnok timla ajak samara liasü, saka Union Home Minister Rajnath Singh-i tang jenjang kanga tapet ka agiogo aser iba telemtetba ya ni kanga pelashishia agizüker aser kasa mapang nung ni Mizoram Chief Minister, Lal Thanhawla nem tenüngsang agütsür,” ta pai ashi.
Centre sorkari iba maparen takok ngua inyakyonga aotsü atema Rina Mitra, Special Secretary (Internal Security) lenisüba kübok committee ka tentettsüogo.
1997 küm Mizo aser Bru kin tsüngda mangatettep adok aser iba sülen Bru nunger kibong aika tekümzükba bushia ki toktsür Tripura-i jena aotsüsa aküm.