Mizoram tsür 8 Gujarat-i anir aodang kümzük

Agartala, July 3 (Agencies): Mizoram nungi tetsür ti tashi Gujarat-i shibelena bener aodang len tom nung apu, ta Deobarnü police-i metetdaktsü.
Iba dak sendakba nung lanur ana pua lir, ta police-isa shisem.
“Guwahati adena Gujarat-i aodang Honibar aonung parnok gari tila ka nungi kümzük” ta police inspector, Ratanmani Debbarma-i osangbener dang ashi.
“Onoki parnok dang asüngdangya asüdang, tetsürtemi parnok aini aoba indang otsü balala ashi. Parnok rongnung nisung tenetbo Kanchanpur (Tripura) nung aliba refugee camp tem nungi lir aser tetsür tanur ka Mizoram nungi class 9 nung azünger kaketshir ka lir” ta paisa shisem.
“Police-i refugee lennirtem den tongtepratepdang parnoki tetsürtem aini aoba osang kecha memeteti liasü ta ashi. Parnok tsüraburtem kanga dang sensak tia nung alir aser iba jagi parnoki jalatemji beauty parlours nung inyaktsü atema Gujurat-i yokerba liasü. Ajisüaka tsüraburtemi kuli tejangja magütsütet. Onoki iba ken o bushisüngdang südar,” ta Debbarma-isa shisem.
Tetsürtemji arishi küm 15 nungi 25 tsüngda nung alirtem lir.
Tesüiba küm 19 tashi Reang tribals (Bru) nunger 31,300 shi ka Mizoram anasa aliba Kanchanpur (Tripura) kübok relief camp 7 nung liyonga arur.
Dampa Tiger Reserve nung Mizo forest ketdnagser ka tepsetba sülen parnok rongrong tulu adokba ajanga Mizoram toktsür Tripura nung oa jenok.