Mizoram tzümetsüng aser anentsü lendong nung nisung 12 süogo

Aizawl, June 20 (Agencies): Tzünglu kanga sashia aruba ajanga June 9 nungi tenzüka Mizoram nung tzümetsüng aruba aser anentsüh aluba agi tang tashi nung nisung 12 tepsetogo aser nisung aliba ki 877 raksatsüogo, ta ketdangser osang ka ajanga tanü metetdaktsü.
Mizoram State Disaster Management aser Rehabilitation department-i June 9 nü nungi tenzüka osang bendena ayuba nung, Lunglei district kübok Tlabung sub-division meketa aliba tesem nungi arishi küm 3 tanur ka dena parnok 10 süogo aser anogo 11 tsüngda nung anentsüh aluba aser tzümetsüng aruba ajanga Aizawl aser Serchhip district na nungi nisung kaka süogo.
Parnokisa ashiba agi, tzümetsüng aser anentsüh ajanga tang tashi nung ki 877 raksatsüogo aser item rongnungi 220 bo kanga mejungi raksaogo aser 657 terara raksar lir.
Tesem ajak rongnung Lunglei district kanga mejungi kongshir lir. Iba tesem nung ki 165 khenyongi raksaogo aser 299 terara raksar lir. Iba sülen Lawngtlai district nung ki 51 khenyongi raksaogo aser 280 terara raksar lir.
Iba den külemi Siaha district nung anentsüh ajanga ki 4 khenyongi raksatsüogo, ta ketdangsertem osang ka ajanga metetdaktsü.
Tzünglu kanga sashia aruba aser anentsüh aluba ajanga Aizawl district nung ki 65, Mamit district nung ki 14 aser Serchhip district nung ki 9 ta, terara raksatsüogo.
State tesem balala nung aluyimba li hectare 137 tzümetsüng ajanga raksatsüogo aser Kolasib district nung ango tzübo 62 raksatsüogo.
Tanga osang ka ajanga ashiba agi, tzümetsüng aser anentsüh ajanga kibong 2000 dak tali dak kongshiogo aser Bangladesh arrtsü anasa aliba Tlabung sub-division nung tzümetsüng ajanga ki 30 dak tali aponger ogo.
Mizoram sorkari iba tensa asadangtsü atema Bodhbarnü Home Minister R Lalzirliana lenisüba kübok High Level Committee ka dentetogo.
Kasa mapang nung NGO tem; Mizo Zaimi Insuikhawm (MZI), Mumbai nung amenoker aliba Getto, Delhi nung amener aliba NGO Goonj aser London nung Salvation Army International Headquarters ajanga Mizoram nung tzümetsüng agi kangshirtem yaritsü asoshi sen bendentar.