Mizoram yim ka nung sen melena shidi amshir

Aizawl, November 18 (Agencies) : Sen 500 aser 1000 senpaktem shibangba ajanga sen tanük agi anüngba tebilemtsü koktettsü mechi nung Mizoram kübok Khawbung yimtak sen melena shidi tilala amshidar.
Iba yim anüdoklen tsütsü aliba Hardware dokan kibur PC Lalhmachhuana-i par yimtak aliba nüburtem dang sen tanük tebilemtsü süngjema maküm tashi sen melena shidi agi sen mesüka yangluba amshitsü mulungdaktsüogo.
“Sen agi anüngba ajanga onoki lenmang ka bushitsü nüngdaka liasü. Sentong tanga ka mebushira shishilemba mapa tamakoktsü kümogo,” ta pai ashi.
PC Lalhmachhuana-i shidangba ama dokan amenertem aser aonsotsü ayokertemi taoba Honibarnü nungi shidi tilala sen amai amshitsü mulunga agizüker yamaji amshia arur. Customer temia iba sentong junger ta pelateper.
Item shidi tem nung sen kwi ibaji zülua lir aser iba den külemi tagütsür tenünga dena zülua lir.
Iba sen ya Honibarnü yimtsüng nung bazzar anogo nungi amshitsü tenzük. Shidi tang süaka Khawbung nung akhi ama shishilembaba mapa takok ngua inyaktetogo.
Yimtak aliba meimchirtem teneden atema inyaker, Mapuia-i, “Iba amala inyakyim ya tesendaktep kanga junga aliba tesem, Mizo nunger yimtak amala ka nunga benshitettsü. Khawbung nung onok nisung shia kanga junga metetepa lir. Küm tsüngda nung onok tsüngda temulung lemtepa aküm. Nisung ajaki pei anibelema aaba sen shingaia külakzüka magitsü jangja meteta lir,” ta ashi.
Iba inyakyim ya sen tanük aser senpak 2000 tasenba yimtak peria anguba sülenbo anenadoktsü, ta paisa ashi.