MJP MLA temi nashi shi Party ayongzüksang MLA dak azük

Srinagar, October 08, 2015: Srinagar nung yashi MLA hostel nung Independent MLA, Sheikh Abdul Rashid-i nashi shi party ayongzüka akaba ajanga tanü, Brihostibar nü Jammu & Kashmir assembly nung BJP MLA temi pa dak azükba noksa nung angur. State nung nashi tepsetba nokdangtsü atema tanü assembly nung Bill ka benoktsü lia pai iba party ayongzüka liasü.

Srinagar, October 08 (Agencies): Yashi Srinagar nung Independent MLA, Sheikh Abdul Rashid-i nashi shi party ka ayongzüka akaba ajanga tanü Jammu & Kashmir BJP MLA kari pa dak zükogo.

Tanü Assembly nung nashi shi nokdangtsü atema bill ka benoktsü lia yashi Srinagar nung aliba MLA hostel nung party agütsüba ajanga MLA Rashid dak zükogo.

BJP MLA temi pa dak azükba mapang National Conference (NC) aser Congress MLA temi senteper ibaji bendangja liasü.

Assembly senden nung nisung dak azükba ajanga opposition party tem kanga ain adok aser opposition nungi National Conference lenir Omar Abdullah-i, iba tatalokba yabo magizükteter, ta ashi.

“Tanü koba atalokogo, iba yabo agizüktsü tasak. Senden nung akhümtaket züngsem ka dak zükogo. Parnoki pa (Rashid) tepsettsü merangba ama reprangtetogo. Ashishitsüsa pai langka kar inyaka lira ibaji tebenok dang benoktsüla,” ta taoba mapang Chief Minister Omar-i ashi.

Nashi shi nokdangba dak sentakba nung Omar-i, “Iba onük atema onokia bilemtsür. Onok tamangba yimsü amangtsüla ta onoki nenok mekangshir. Kü tamangba yimsü (Muslim) ajanga yi ajemtsü aser ak shi achitsü memelar. Ak shi achir mesüra yi ajemer kar dak ni azük asü(?),” ta shia iba onük nung Chief minister-i sangdong ka agütsütsüla ta pai akhang.

Iba tatalokba aija Chief Minister, Mufti Mohammed Sayeed-i, “Iba tatalokba ya ni aitsür. Senden nung sobaliba yimya tajung lir. Tazüoukba alitsüla. Party MLA temi tim mesüi inyakba atema ni Deputy Chief Minister Nirmal Singh dang tatok meshitsü ta akhanger,” ta ashi.

Iba sülen Singh-i, “Tanü assembly nung kechi atalokogo, iba ya onoki magizüker. Ajisüaka yashi MLA hostel nung kechi atalokogo, ibajibo tai,” ta ashi.

Deputy Chief Minister-i jungjunga tatok memeshiba ajanga opposition züngsem ajak senden nungi ayazüka lua liasü.