Mkg-Chare tsüngda apu ka ponger ao, anentsüh agi lenmang shibanga lir

Chare, Aug 17 (TYO): Tawa tzünglu sashia aruba ajanga Chare town o Mokokchung na tsüngda National highway 202 (155) nung motzü (mud flush) agi apu ka okshia ponger ogo aser anentsüh tulu aluba ajanga gari kata mejajateti lir.
Anentsüh aluba tesemji Chare town nungi kilometer 7 shi pilar New Chungliyimti yim matongdang lir. Iba anentsüh aluba aser apu ponger aoba ya Aug 14 & 15 nü atalokba lir, ta iba osangbeneri Chare EAC, Kupeusing Meru den jembidang pai ashi.
Tang garitemji teimba Mokokchung-Dikhu-Chare (short cut) lenmang aser Thronger-Longmisa-Mokokchung lenmangtem nung jajadar. Thronger-Longmisa-Mokokchung lenmang nungbo apu tashi maitba ajanga gari tila dak alaka tulubo mesenzüdaktsür, ta EAC Meru-isa ashi.
Mokokchung-Dikhu-Chare (short cut) lenmang ya kanga temesü aser tesem-tesem nung anentsüh aluba ajanga gari tulutembo sadem-sademabo mejajateter, anungji, department of PWD (NH) aser Village Disaster Management Authority (VDMA, Chare) nati anentsüh aluba tesemtemji akokba tashi odoka yanglushidaki, ta paisa shisem.
“NH 202 nung apu ponger aoba aser anentsüh alur alibajibo tang-tangbo meyanglutettsü amai bilemer, ashiko, ibaibo taküm küm tashi nunga meyanglutettsüa akok”, ta paisa ashi.
EAC Kupeusing Meru aser Tuensang & Mokokchung District Disaster Management Officer (NSDMA) T.Wangshi Jamir nati anentsüh aluba aser apu ponger aoba tesemtem semdanga liasü aser item lendong atalokba dak sentakba nung tim maparen inyakdaki, ta osang angazüker.
Sangtam lima nungi tzü atsüba Mokokchung tzü pipe line-a anentsüh aser motzü agi tesem aika nung raksa lir, ta Mokokchung PHED E.E Yangeri iba osangbener den jembidang metetdaktsü.