Mkg civil hospital nung dialysis unit amenokogo

Mokokchung, Sept 17 (TYO): Mokokchung district aser kidanger district tem asoshi osang tajung kaji Imkongliba Memorial District Hospital (IMDH) Mokokchung nung Sept 17 nungi tenzüka Dialysis unit lapokogo. Tanü iba dialysis unit lapokba sentong tongmelang ka IMDH nung agia liasü.
Fairfax India Charitable Foundation (FICF) ta sür company kadi sen lakh aika jenjang dialysis machine pezü (4) tashi tenla agütsü. Iba den külemi central sorkari achaayangba National Health Mission kübok Pradhanmantri National Dialysis Program (PMNDP) ajanga tanga nungdakbatemji agütsü aser item rongnung dialysis machine amshir technician ana densema lir.
Nagaland nung Government hospital rongnung iba unit amenokbaji Kohima mezüngbuba lir aser tanabubaji IMDH asütsü aser iba unit amenokba ajanga Mokokchung district nüburtem dang masü saka temeket district-tema tajangzük tulu angutsü imlar, ta IMDH Medical Superintendent (MS), Dr. Medemi mapang tatsüka agia jembidang ashi.
Dialysis agitsübaji jenjang kanga tasak lir, saka yangi iba dialysis agiba atema sen mechimenu dang agitsü, anungji, nüburtemi iba maongka ya agitsüla, ta paisa ayongzüka ashi.
Dialysis unit meshiteta Mokokchung Town Baptist Arogo (MTBA) Associate Pastor, Yanglui sarasademer lapoktsü. Tanü iba unit lapokba sentong nung Mokokchung chief medical officer (CMO), Dr. Chubala Aier densema liasü.