Mkg D.C bungalow kima süngkong ka chiteta ayu

Mokokchung D.C Sushil Kumar Patel IAS-i Mokokchung D.C Bungalow nung süngkong tasen ka lapoktsür külen Ao Senden ketdangpur aser Dobashi-tem külemi noksa nung angur. Mokokchung, June 9, 2017.

Mokokchung, June 9 (TYO): Mokokchung D.C Bungalow kima süngkong tasen ka Hogulabarnü Mokokchung Deputy Commissioner Wb. Sushil Kumar Patel IAS ajanga meraketa lapoktsüogo. Iba süngkong ya Mokokchung District Dobashi-temi achayanga yangluba lir.
Iba süngkong lapokja Sushil Kumar-i jembidang, akhi tsürabur tendak süngkong ajanga tejashi, tepela aser mapang balala nung osangtsüsangtem sangdong, iba ama sobaliba tajung ka tarutsü lanu putu asoshi wazüka ayutsübaji kanga nüngdaker, ta ashi.
Taoba mapang tensa tia balala nung iba süngkong atemdang nüburtem lungjema atenshiba ama tanüa Naga lima nung telungjem nüngdaka lir, ta paisa tayongzükba ka agütsü.
Naga nungerji tangar dang nungi libaliru aser sobaliba balaka ta ajiteta ibaji benshia aser wazüka ayutsü asoshi India temzüng nunga Arla balala inokja lir, iba ama arla balaka inoktsübaji India lima aika nung mali, ta paisa ashi.
Aji oda, tesüiba ya kanga tongtibang lir, tesüiba otsü meteni tang aser tarutsü renloka aotsübaji tasak asütsü, ta paisa sobaliba wazüka ayutsü ajungshia liasü.
Süngkong ama akhidang amshiba oset yagi rali-walir aser alima penzüa senzürtem asoshi tepuatsü mapa tajung ka asütsü imlar, ta paisa ashi.
Kasa sentong nung Ao Senden tir Wb. Imliyanger Jamiria mapang tatsüka agidang, tanü joko yimtsüng aika nung süngkong ya mali, iyongji lanur aikati iba ya mangu aser iba indang ya memetet, iba ama tia ka nung alidang Dobashi-temi kanga junga shisateta süngkong yangluba ajanga tarutsü putu asoshi lenmang aisü nung tajangzük angutsü imlar, ta ashi.
D.C Bungalow nung aliba süngkong ya talang nung saklep (ft) 25 aser tenari nung saklep 8 shi lir. Iba aou (hollock) süng ya minkong arem nungi lenzüka bener aru aser ibai ita ka shi agia chitet, iba mapa inyakdang nübu 105 shi atsük aser sen 1.6 lakh shi indoka renemtet, ta Dobashi kati osangbenertem den jembidang ashi.
Iba süngkong ya tongtibangsa külemkijatsü atema yangluba masü saka akhi asen tsüraburtemi benshia aruba mapa tajungtemji mesamadaktsüi tarutsü lanu putu nem nüngo ama wazüka yutsütsü nükjidong nung yangluba lir, ta Dobashi-temisa ashi.
Akhidang asen tsürabur mapang süngkong yagi osangtsüsang tapu balala sangokja liasü. Lendongtsüdong aser benjongbentsü balala nung iba ya atem, süngkong atemba ya yimya tapu balala lir aser iba nung ya tetezü aika keta lir, ta parnokisa shisem.