Mkg D.C Bungalow nung arju ki ka yanglu

Mokokchung, Rongchii 16 (TYO): Tentonü (Monday) Mokokchung D.C Bungalow kilem nung Mokokchung Deputy Commissioner, Sachin Jaiswal, IAS ajanga arju ki tasen ka lapoktsüogo. Iba arju ya Mokokchung Dobashi-i tarutsü lanu putui Aor sobaliba senmangtsümang mamadoki wazüka ayutsü nükla yur asüba lir.
Tanep D.C Bungalow nung sentong tongmelang ka agidang, Mokokchung D.C-i Mokokchung Dobashi-temi Aor senmang (heritage) wazüka ayutsü meranga arju ki asüba asoshi pelaba metetdaktsü. Nagaland nung akhi senmangtsümang aliba Bungalow-ji joko Mokokchung D.C Bungalow ya dang asütsü, ta paisa ashi.
Mokokchung district kübok school tanur shirnokisa pei azüngba wadang nung tangar dang nungi alakteta takok ngudir, item kaketshirtem nem Mokokchung D.C Bungalow semdangtsü/reprangtsü asoshi maongka agütsütsü, ta paisa tebilemba ka lemsatepa liasü.
Iba arju asütsü asoshi Mokokchung D.C-i kimung melaba den ano taoba Minister/MLA aser DPDB Chairman, Merentoshi R Jamir-i LADP senpong nungi rongsen lenmang lapoktsüba ajanga iba arju ki ya sütetogo, anungji, parnok ajak dang pelar, ta Mokokchung Dobashi-i metetdaktsü.
Yaküm 2017 nunga Mokokchung Dobashi-isa Mokokchung D.C Bungalow kima süngkong tajung ka yanglua lir.
Tanep iba sentong nung Mokokchung D.B-tem den ano Mokokchung district administration-tem, Ao Senden nungi ketdangpur kar aser osangzülurtem densema liasü. Sentong nung Ao Senden tongti zülur, S.Temsü Aier-ia mapang tatsüka agia tepela o lemsatepa liasü.