Mkg dak alaka Tuli nung 14, Mangko nung 13-i nomination file süogo

Jan 9 tashi nomination file asütsü anogo atsülangtsür

Mokokchung, January 9 (TYO): Jan 3 nungi tenzüka Jan 7 tashi Municipal aser town council nung election-i inürtem atema tenüng agütsüba mapang lapoktsüba maparen nung tenokdangba jenti liaka, Tuli nung candidate 14 aser Mangkolemba nung candidate 13-i nomination file süogo saka tang tashi nung Mokokchung Municipal Council atemabo candidate shingaia nomination file süa mali ta osang jangjaogo.
Nagaland municipal Act nung Aor/Naga nunger sobaliba dak mapetba onük kar densema alinung, ibaji meyanglushi tashi Ao litsü aser Nagaland tesem kecha nunga Aortsür Aor shingaia municipal aser town council election nung shilem magitsüla, shirnoki iba anema inyakdir parnokji Ao Senso nungi jentoktsü, ta So Sendeni renema lir.
Ao Senden telemtetba anema Aotsür/Aor shirnoki municipal aser town council election atema nomination file süogo, parnok anema Jan 17, 2017 sülenji action agitsü, ta Ao Sendeni metetdaktsüogo.
Naga nunger temeden wazüka ayutsü asoshi anogo pungu nü tashi nomination file mesüdaktsüi nokdanga aruba mapang ka, ano state sorkari candidate kar mechi nung nomination file asüba anogo Jan 9, 2017 tashi atsülangba yabo tim masü, ta Ao Senden lenirtemi osangbenertem den jembidang mepelaba o ka metetdaktsü.
Sorkarji nüburtem atema alir aser nübur ola mangadangi aotsübaji tim masü. Anungji, iba dak sentakba nung mapetmesü mesüra lendong timtem kar danga atalokra ibaji sorkar khuret asütsü, ta parnokisa mepelai ashi.
Tanüa Mokokchung Deputy Commissioner office anasa Ao Senden ketdangsürtemi anir, yim asem nungi Likapur, Ao Kaketshir Mungdang aser All Ward Union Mokokchung Town nungi nütsüng nübur aika adenshia nomination file mesüdaktsüi nokdangba sentong nung shilem agia liasü. Ao Senden tetuyuba nung tanep 11 ako nungi nikong 3:00 ako tashi Mokokchung town ajak mokdanga liasü.
Jan 8 Deobarnüa anepdang 8:30 ako nungi tenzüka kasa nüburtem adenshia ano tesashiba nung nokdangtsü lokti terenemba lir, ta Ao Senden ketdangsürtemisa metetdaktsü.
Changtongya town nunga anogo pungu nü tashi nung candidate shingaia nomination file asüba osang kecha mangazüker.
Mangkolemba nungbo Jan 6 & 7 anogo ana tsüngda candidate 13-i nomination file süogo. Item rongnung NPF nungi candidate 6, BJP- 3 aser Independent nungi 4 lir, ta Mangkolemba ADC Imtiwapang den iba osangbeneri telephone ajanga jembidang pai metetdaktsü. Tang tashi nung Tuli nunga NPF candidate 9 den BJP 1 aser Independent candidate 4-i nomination file süogo, ta Tuli EAC den jembidang pai metetdaktsü.
Municipal & town council election dak sentakba nung candidate kari nomination file asüba anogo tera atsülangtsü mepishia asüngdangba ajanga, state election commission office nungi Jan 9 tashi atsülangtsüba osang kar ajanga angazüker.