Mkg DC & DPDB Chairman-i shisaliok atema mission tenzük

August 07, 2017 nü ADC (Planning) Conference Hall, Mokokchung nung Mokokchung DC, Sushil Kumar Patel, IAS-i Mokokchung DPDB senden nung jembiba noksa nung angur.

Mokokchung, August 07 (TYO): Hombarnü Mokokchung nung Mokokchung Deputy Commissioner aser District Planning & Development Board (DPDB) Chairman, Sushil Kumar Patel, IAS-i district nung aliba sorkar school tem nung shisaliok jenjang ajungkettsütsü atema mission ka tenzüktsüogo.
Tanü ADC (Planning) Conference Hall nung DPPB senden nung pai iba osang metetdaktsü.
Patel-i, Education department, Administrative Officers amalitepa tajemba agi school kabo shimtsü aser mapang shia school ji semdanga tesayurtem aser kaketshirtem den shisalemsateptsü, aser ibaji ajanga parnok ajungmesotsü, ta metetdaktsü.
Ketdangsertem jagisa sorkar school tem nung kaket alemba aser mid-day meal ama scheme tem indang tesayurtem den jembitsü.
Iba mission nung administration dak alia ketdangsertemi shilem tajung agia meinyakra iba mission ya tamakok angutsü, anungji Head of departments-i tesayurtem aser kaketshirtem nungita shilem agidaktsüner, ta paisa ayongzük.
Senden nungsa ADC Mangkolemba kübok Luyong aser Longnak nung EAC Hqs tentettsü aser EAC Chuchuyimlang kübok Pangsang nung EAC Hqs tentettsü atema jembi.
Ano Ongpangkong, Longchem aser Chuchuyimlang nung EAC nungi SDO (C)-i ajungkettsü atema jembi aser itemji sorkar matsüngdang benoktsü lemtet.
Senden nungsa assembly constituency 10 nung LAPD 2017 atema committee tentettsü, People’s College Alumni Association Mokokchung registration agitsü aser Satsu yimdak (Mangmetong) Govt. Primary School ka amenoktsü atema jembia liasü.
Maneni senden nung Longsa yimdak Children Day’s School nem senotsü teyari agütsütsü, Government Primary School Sungkum, Mangmetong agi Chubanungba Government Primary School, Mangmetong ta melentsü atema agizük aser iba atemaji sorkar matsüngdang benoktsü lemteta liasü.