Mkg DC-i DDMA dang kümdanga alitsü tuyu

Dimapur, November 7 (TYO) : November 7, 2016 nü ADC Planning, Mokokchung indang Conference Hall nung Mokokchung District Planning and Development Board (DPDB) senden amen.
Senden nung mendenji Mokokchung DC & DPDB Vice-chairman, Sushil Kumar Patel IAS liasü aser pai District Disaster Management Agency (DDMA) züngsemtem dang kümdanga mita alitsü tetuyuba agütsü.
Mokokchung district nung anogo ana-asem ka tzünglu kanga aruba dak sendakba nung Mokokchung DC-i iba tetuyuba agütsü.
Mokokchung district nung May 1, 2016 nü lendong nung DDMA aser DPDB-i mapang shitak nung mapa inyakba bilemteta Sushi Kumar-isa züngsem ajak dang osangtsüsang metetpela alitsü mepishi aser district administration-i mapang shitak nung mapa inyaktsü atema pa nem osang sangoktsütsü shisem.
Mokokchung DC-isa National Highways aser Roads & Bridges Department tem dang district nung gari lenmang tia metettsü aser senzüsenbongertem tetsükdaktsü melii senzütsü atema lenmangtem anepalutsü ayongzük.
Tanü senden nung Land Use Policy indang onük benokla olemtepdang, paisa Heads of Departments dang mapang shia yimtsüngtem semdanga yimdaklirtem dang iba onük metetdaktsütsü merangang ta paisa ashi.
Senden nung Local Area Development Fund (LADF) atema ‘verification committee’ ka tentet aser taruba ‘DPDB cum advent Christmas’ sentongji December 7, 2016 nü alitsü ta Sushil Kumar-isa ashi.