Mkg DC-i ‘District Youth Convention & Cultural’ sentong lapoktsü

Mokokchung, February 06, 2016 : Ongpangkong Salang, Mokokchung nung Nehru Yuva Kendra, (NYK) Mokokchung-i ayonga amungba ‘District Youth Convention & Cultural’ sentong nung Mokokchung Deputy Commissioner Sushil Kumar Patel IAS-i o jembia noksa den sobaliba  tsüsang ajanga shilem agiba noksa nung angur. (DPRO Mokokchung)

Mokokchung, February 06 (TYO) : Ongpangkong Salang, Mokokchung nung Nehru Yuva Kendra, (NYK) Mokokchung-i ayonga amungba ‘District Youth Convention & Cultural’ sentong nung Mokokchung Deputy Commissioner Sushil Kumar Patel IAS tongti tesemdanger süa sentong lapoktsü.
Sentong lapoktsüba mapang o jembidang, Sushil Kumar Patel-i, taküm nung tamakoktsü kecha mali kechiba süra teti renema aliba aser maoangka tajung melalui agiba ajanga takokji angur,” ta ashi.
Patel-i, “Lanurtemi tensa mopung meteta alibaji tarutsü nükla tamendakdak asütsü. Anungji nisung kati pei kechi kümner iba nung jangja jangja amiter kanga bendanga inyaktsüla kechiyong bendanga agüja inyakba ajanga mapa tasak ajaka temela kümdaktsür,” ta ashi.
Sushil Kumar-isa, “Shisatsü nung merenlokra tangar den metokteptettsü aser taküm nung takok mangutsü. Asenok jangratema aliba tesem nungi adoker taküm nüngdak asoshi bendanga agüja inyaktsü mapang tongja tongogo,” ta ashi.
Iba sentong nung District Youth co-ordinator, NYK Mokokchung, John Makhabo-i, nüngdakba osang agütsü aser Oriental Club, Salu Zunga aser Season Star Club temi sobaliba jilushi kar ajanga shilem agi.