Mkg DC, Patel-i Multipurpose Court ka lapoktsüogo

Mokokchung DC, Sushil Kumar Patel (Abelen, pungobuba)-i CTC, Aolijen, Mokokchung nung Multipurpose Court lapoktsüba sülen Mokokchung yimsüsürtem, CTC tesayur aser ketdangsertem den aroki agiba noksa ka yangi angur. (Aolijen, January 17)

Aolijen, January 17 (TYO): Mokokchung Deputy Commissioner, Sushil Kumar Patel-i Mokokchung kübok Clark Theological College (CTC) nung multipurpose court tasen ka tan Honibar nü lapoktsüogo.
CTC aser anameta alir nüburtem ajangzükdaktsütsü nükjidong nung taoba mapang, 2010 küm nungi tenzüka maparen inyaka aruba sülen basketball & badminton court, Children Park aser sentong balala agitsü sabang densemba multipurpose court ya tan lapoktsür lir.
“CTC-i tesüiba mapang, 1972 küm nungi tenzüka laishiba aser Khristan tamangba yimsü tesayuba tajung Khristan lenirtem nem agütsüba atema CTC nem tenüngsang agütsür,” ta tongti tesemdanger, Patel-i metetdaktsü.
“Tsüngremi meimchirtem kang junga yanglu saka merumeru, pei kija ajangzüktsü merangba, nisung tepsetba, ochimashiba aser iba amala tashidak balala nisunger dak atemba yong Arogo nung sannükertem, Mosque nung Mualvis-tem aser Temple nung Pundits-temi nisunger nungi tashidak tamajungji agientsütsü asoshi bendanga agüja inyaker. Iba amala tashidak tamajung agiena alima ajunga nung temeimtep alitsü koka lir ta nüburtem den lemsateptsü mapang tongogo,” ta tongti tesemdanger-i tayongzükba olen ka lemsatep.
“Alima tali tatsükba akümba ajanga tsüngsang mupong balaka küma melenshiba, tzü peria mongui akümba, tzü mupong memerüki akümba aser alima nung nütsüng yongsük tali akümba ya arok tebilemtsü khuret lir, anungji, asenoki asen lima tajungba kümdaktsütsü nükla tulu ayutsü nungdaka kümogo,” ta paisa shisem.
Multipurpose court lapoktsüba sentongji tembangba sülen Tali Angh & the Band, Sweet Spirits (BD II), Believed, Tree pillar (Revival Church), Pointer (BD I), Moa Jamir (CTC Alumni), Ungma Church, Kingdom Bound (BD IV), Sungkomen, Spark!! (BD V) aser Girls Band teloktemi kenten sentong ka agia Tsüngrem nem tenüngsang agütsü.