Mkg Dist A/C 10 nungi NPF ketdangpurtemi T.R Zeliang, Rio aser Mkg dist nungi adoker tatartem pusemtsü lemtet

Mokokchung| August 8 (TYO): August 7 nü Kohima yimtiba nung Mokokchung District kübok Assembly Constituency 10 nungi Naga People’s Front ketdangpurtem aser constituency 10 nungi adoker tatartem telungjem senden ka mena bangzüng kar renemba osang ka ajanga metetdaktsü.

Mezüngbuba bangzüngji; NPF party ya grass root party ka lir aser iba party nung ya temalen nungi ozüng amshia anishiba kecha mali, anungji, Assembly Constituency-temi kechi telemtetbatemsa agidir, tatartem süshia mesüra divisional level nung süshia aser central level nung süshia ajak nung iba jagi alentsü, ta renema liasü.

Tanabuba nung; Mokokchung district nungi adoker tatartem, tawa shimba interim NPF tir Neiphiu Rio (Lok Sabha MP) aser Chief Minister T. R Zeliang-i aniba sorkar, temulungjang ajak agi nungita pusemtsü lemtetogo.

Tasembuba nung; division aser central nung meyonger (representatives)-temji pei Assembly Constituency ajanga dang shimer asünung, divisional aser central office nung inyaktsü asoshi shirnoksa Mokokchung Assembly Constituency nungi shimer yoka lir, parnok ajaki iba bangzüng nungji anidaktsüla, aji mesüra, aibelener anema temerenshi alitsü, ta lemtet.

Pezübuba nung; NPF Working President Apong Pongener-i Mokokchung district tatartem anentsüba/aridokba maparen nung shilem agia kuli asüba atema teloki pa aitsür, pai tatartem anentsüba/aridokba dak sentakba nung kuli süa alibaji, takaratiba nung meyipa agitsü akhanger, aji ta mesüra, pa anema tapet temerenshi agitsüsa akümtsü, ta teloki renemogo.

Iba senden nung Mokokchung district kübok Assembly Constituency ter; 21 Tuli, 22 Arkakong, 23 Impur, 24 Angetyongpang, 25 Mongoya, 26 Aonglenden, 27 Mokokchung Town, 28 Koridang, 29 Jangpetkong aser 30 Alongtaki nungi NPF tirtem aser tongti zülurtemi item bangzüngtem agizükba temaitsü meyongnem agüja liasü, ta osang ajanga metetdaktsü.