Mkg dist kübok Merayim ta sür yim tasen ka kümogo

Mokokchung D.C, Sachin Jaiswal, IAS ajanga Merayim tasen akümba temaitsü lungzüng ka azüngtsür külen sentong nung tongti shilem agirtem aser Merayim yimsüsürtem külemi tangokba noksa nung angur. Mokokchung, November 28, 2018.

Mokokchung, Nov 28 (TYO): Mokokchung district kübok Merayim ta sür yim tasen ka akümba temaitsü Nov 28 nü Mokokchung Deputy Commissioner, Sachin Jaiswal IAS ajanga nüngshilung ka azüngtsüogo. Tsüngrem tenzüker Missionary Kari Longchar ajanga iba nüngshilung meshiteta sarasademtsü.
Iba yim tasenba ya Changki yim lushi kübok Changki valley nungto lir. Ibai yim makümdang Changki yim kübok Merakiong ta sür mepu ka liasü. Iba yim tasenba ya Mokokchung nungi kilometer 52 shi pilar Longnak anasa lir.
Tanü iba sentong nung tetushi tejaoker, Sachin Jaiswal-i jembidang, iba yim ya tasen akümer asünung nungdakba aser teinyaktsü mapa aika alitsü, anungji, district administration-ia akokba tashi terenlok mapa balala nung yariteptsü mulunga lir, ta metetdaktsü.
Tang Mokokchung district kübok iba yim tasenba ya zünga yim 89 asütsü. Joko yim ka akümer asünung, Village Council Act temzüngjia kanga junga meteta maparen balala inyaktsü asoshi pai ajungshia liasü.
Yim shia village council-tem ya sorkar asoshi tongtiret ka lir, anungji, maparen ajak nung district administration den amalitepa inyaktsü asoshi pai ashi. “Council tashi itta lira administration tashi aiter”, anungji, akok tashi yimdak tebilemtsü madoktsü asoshi kanga junga yimsü asütsü asoshi paisa shisem.
Yimdak VDB maparen tenzükdang VDB inyakyim nung tuyua aliba ama tetsür aser lanurtema mezüngtoki züngsemdaktsütsüla, ta paisa ashi. Yimdak terenlok mapa kobasa arudir, item nungji tebilemtsü madoktsü atema ochi shia mapa shitak inyaktsü asoshi paisa ayongzük.
Yim aika nung züludena/rizünga ayuba mapa (documentation) nung tashi maitba angur, ibaji ajanga sorkar mapa aika nung tetsükdaktsü ajurur, anungji yimdak kechi mapa inyakdir inyakaka ajakji tezüluba nung record tejangja ayutsü merangtsüla, ta paisa inyakdaktsünüba o ka ashi.
Tanübo akhi ama masü, sorkari sentong ajak nung teyari angutsüpur nem sen ajak pei bank account nung dang indangindanga inoktsür, itemji yimsüsürtemi meteta kilen shia bank account lapokdaktsütsüla aser mapa kar nungbo Aadahar sentakteptsüsa akümer, anungji, itemji yimsüsür ajanga yimertem nem angatetdaktsütsüla, ta paisa temetettsü kar ashi. Bank A/c melira sen mangutsü aser asenoksa akoksatsü, ta paisa shisem.
Tanü social media balala ajanga olulu aika perokshir, iba ajanga nüburtem mangmangteper. Anungji, iba ama mapang ka nung anasa aliba administration mesüra concerned official den yakta tongteprateptsüla aser osangji jangjar dang maparen balala inyaktsü asoshi paisa tekümdangtsü ka ashi.
Iba yim tasen akümtsü atema ya tongtibangsa taoba Circle Officer Asür Imtionen aser taoba Agri. Inspector Asür Sungtikumba tenati tongti shilem agia liasü. Aji oda, 29th Dec 1959 nung Changki Medemjangeri Putu mapang iba tesem ya Changki yim kübok Merakiong Sector ta kümteta aotsü lemtet aser 16th Feb 1960 nü taoba Mokokchung D.C Major R Khating-i Merakiong Sector mesemtetba nüngshilung azüngtsü.
1960 nung kibong 30 dang arua iba sector mesem saka 2011 census nungbo kibong 119 tashi renlokogo. Küm 52 lir külen 12th Feb 2012 nung Süngdakba Putu ajanga Merakiong Sector nungi Merayim akümtsü temelaba angu aser 12th Oct 2017 nung Merakiong ya officially yim ka ama state sorkari agizük. Aji sür, Nov 28th 2018 nü ibai Mangkolemba Sub-Division Mokokchung district kübok yim ka ta züngsemogo.
Tanü iba sentong nung Mangkolemba SDO (C) Atsüng Walling, SCERT Joint Director Shilu Amri, Acting Council Chairman Akang Amri GB, MSME-DI Imphal & Dimapur Director In-charge Tali Longchar, Moasanen Longchar, Imdong Pongener, Chubamenla, Merayim Baptist Arogo pastor I. Sunep, Nokon Baptist Arogo pastor Chubatoshi, Süngdakba Council Changki, Changki Ayim Asem Council, Chungliyimsen Village Council nungi meyongertemi shilem balala agia liasü.