Mkg dist nung mezüngbuba MGNREGA kübok ‘social audit public hearing’ sentong agi

Mokokchung, Sept 15 (TYO): Society for Training & Research on Rural Development Social Audit Unit Nagaland ajanga Mokokchung district kübok RD block nungi yimtsüng pungu nung MGNREGA mapatong inyakba indang “Social Audit Public Hearing” sentong ka yangi Longkumer Kilem Mokokchung nung takok ngua agiogo. Iba sentong ya Mokokchung district nungbo iba ya mezüngbuba asütsü.
Item yimtsüng punguji Ongpangkong North block kübok Mokokchung yim aser Aosettsü yim na liasü. Tsürangkong block nungi Chungtiayimsen, Mangkolemba block nungi Khar aser Kobulong block nungi Longpa yim liasü.
MGNREGA sentong kümsük 2014-2015 nung item yim pungu nungji mapa (project) 22 inyakba nung sen crore ka sür mechimenü indokba osang Social Audit Unit ketdangsürtemi metetdaktsü. Item mapa inyakdang senotsü amshiba nung tashishitsü kecha mali ta yimertemi kuli agüja audit maparen tembanga liasü. Tanüngba yimtsüngtemji October ita nungi tenzüka audit maparenji agitsü, ta osang ajanga angazüker.
Tanü iba sentong nung Observer-ji Mokokchung Asst. Commissioner Ajit Kumar Verma IAS liasü aser pai mapang tatsüka agia jembidang, mapatong balala inyakba indang tezülubatem (paper works) aser osangtem kanga junga renemba den ano mapa inyakba shia kuli atema noksa aser signboard-tem yanglutsü asoshi ajungshia liasü. Paisa social audit maparen indang ya nüburtem nem kanga junga angatetdaktsütsü asoshi yimdak yimsüsür aser lenirtem dang inyakdaktsünüba o ka shisem.
Social Audit Unit tentetba ya tongtibangsa MGNREGA sentong kübok mapatong balala atema yokba senotsütem sorkari tuyuba ama ochi shia amshir asü mamshir ta asüba repranga asadangtsü nükjidong yur tentet, ta Nagaland Social Audit Unit nungi State Resource Person (SRP), Moalong-i metetdaktsü.
Sentong nung Liboni Humtsoe (DPC MGNREGA & PD DRDA, Mokokchung)-ia mapang tatsüka agidang, Social audit agiba ya kanga tajung, kechiyong iba ya ajanga mapa inyakba ajak nung tali kümdanga aser ochi shia inyaktsü imlar, ta ashi.
Tanü iba sentong nung District Resource Person Toshimaneni Social Audit agiba nungi tengutetba osangtem lemsatep. Iba den ano yimtsüng pungu nungi yimsüsür aser meyongertemia shilem agia sensaksem ka agi aser tarutsü nung inyaka aotsü bangzüng kar renema ayu.