Mkg District Bharat Scouts & Guides tenzüker küm 75 jungogo

Minister, R.D & SIRD, Metsubo Jamir-i Mokokchung District Bharat Scouts & Guides pur jubilee nüngtem yangluba nüngshilung lapoktsüdang tangokba noksa nung angur. Mokokchung, 25th Oct. 2024.

Mokokchung, Mongputeni/Oct. 25 (TYO): Mokokchung District Bharat Scouts & Guides (MDBSG) tenzüker küm 75 ajungba jubilee sentong ka October 25, 2024 nü yangi P. Shilu Ao Memorial Park, Mokokchung nung meraketa mungogo.

Iba sentong nung tongti tesemdanger Metsübo Jamir, Minister, RD & SIRD Govt. of Nagaland-i jembidang, Scouts & Guides ajanga tepela tajangshiba balala agütsüba den nisung ka dak mulunglemtet, tasütait, tejungnü aser ochishiba apuoktsür, itemji Scouts & Guides indang nükmen ka dangbo masü; itemji taküm nung sobutsü aser temulung nung azüita asen jakdang aliba lenmang balala sayua anir, ta metetdaktsü.

Nagaland Scouts & Guides maparen ya 1937 küm Kohima nung tenzük aser Mokokchung nung 1949 küm taoba Govt. High School Mokokchung principal, asür Mayangnokcha lensayuba kübok takutet asür Lolennokchaba lenisüba nung tenzüka aruba tanü küm 75 jubilee amunger, ta metetdaktsü.

Scouts & Guides tentet ajanga alima nung lenla balala nung nüngtugu nisung aser lenir jenti adokdaktsüogo; tatishitsü kar – Martin Luther King Jr, John F Kennedy, Bill Clinton, Barack Obama, Sir David Attenborough, Steven Spielberg, Sir Paul McCartney, Neil Armstrong, Bear Grylls, Andy Murray, David Beckham, Venus Williams aser Taylor Swift ama aser Nagaland nungia taoba CM asür Jasokie, asür Samuel Mezur aser ano aika lir, ta pai ashi.

Paisa Scouts and Guides indang khuret kar lemsatepdang, khuret abenbaji asen lokti nung nai jangrabangraba ajanga tatishitsü tajung sayur, nai alima asoshi mapa tajung inyaktsü tenangzükba agiogo, item tenangzükbatem inyaktsü asoshi pei atema mebilemi nübur atema taküm bendanga agüja tenzüktsü nungdaker aser ochi nungi majentsüla, ta pai ashi.

Talisa asen sobaliba jenjang keta amshitsü asoshi angazüktsüla aser asen senmang tongtibang indang kadi ka den angazükteptsüla, aji asünung dang nai ochiba nung nemadanga pur tsüngdang noktaktettsü, ta paisa shisem.

Tanü lanurtem tebilemtsü aser khuretji onsara aser tasak kümogo. Aji oda, na Scout & Guides nung züngsemba ajanga na khuret abenba senso aser lenir ka akümtsü asoshi angazüka alitsü aser tanü loktii ajangshiba tebilemtsütem paitoktettsü, aser tanü aser tarutsü lanu putu tesangwa asoshi yanglutsü ta amanger, aser asen lokti aser nübur terenlok asoshi asenoki khuret abentsü paisa ayongzüka jembi.

Nenok ya asüng atema lenir ka dang masü; nenok ya asen lokti melenshitsü asoshi kanga dang nüngdakba tajungshir lir ta amangdaktsünür, ta pai ajungshia ashi. “Ochiba agi anitsü, mapa agi ajungshia sayuang aser taküm bendanga agüja tenzükang”, ta paisa shisem.

Sentong nung Mokokchung DC aser President, MDBSG, Thsuvisie Phoji-i tarurtem ajak pela-a agizük, V.K. Shah, State Commissioner (S) Nagaland State Bharat Scouts & Guides, Sentinenla, DEO & DCC (G) Mokokchung, aser taoba mapang Scout tenzüker tsürabur Moajenba parnoki o tatsütsü jembi. MDBSG indang süiren otsü tatsüka Lipomar Lkr DOC (S)-i lemsatep. Ladybird School BS &G-i kentenmenü ajanga shilem agi. Iba sentong nung Sentimenla, ADOC (G) menden liasü. Pastor Rev. Ponen Longchar den temoatsü meshia sarasademer sentong tenzük aser Assoc. Pastor, Rev. Talijungla den tenüngsang agüja sarasademer shibang. Tongti tesemdangeri jubilee nüngtem adoktsü aliba souvenir ka sayatsü. Iba sentong nung sorkar tenzükertem den state aser district balala nungi BS & G officials-tem aser Mokokchung district kübok aliba school balala nung BS & G pur arua shilem agia aden.

Tanabuba Jubilee Campfire sentong ka liasü aser iba sentong nung Col. Rahul Gurung KC, Commandant, 12 Assam Rifles campfire chief liasü. Iba sentong nung school balal nungi kentenmenü, jilushi aser yartsüngsang tapu balala ia shilem agia liasü.