Mkg district kübok A/Cs 10 nungi NPF senden amen

Mokokchung, April 03 (TYO): Naga People’s Front (NPF) Divisional Office ketdangpurtem aser Mokokchung district kübok Assembly Constituency 10 nungi party tenzükertem shisalemsa senden ka April 3, 2019 anogo NPF Divisional Office, Mokokchung nung agia, taruba Lok Sabha aser 26 Aonglenden Assembly Constituency by-election dak sendakba teinyaktsütem jembitep aser pei tesem nung teinyaktsü mapatem lemsaogo, ta Media Cell, NPF Mokokchung Division-i sangdong ka nung metetdaktsü.
Senden nungsa party temaba menden nung alir lenirtemi lemtetba ama, Congress party nem ‘issue-based support’ agütsütsü lemtet. Congress party den yariteptsü maparen ya Communalism, obangmapu agi sünga aliba Citizenship (Amendment) Bill, 2019 aser tekaratiba nung Naga yimtenren ken o telemtetba ka dangi bener arudaktsütsü nükjidong nung khen atema teka amteptsü lemtetba ka lir, ta sangdong nung shia lir.
Senden nungsa Congress party nungi nübo abensa maliba tesemtem nung NPF-i nübo agüja yariteptsü lemtetogo; iba senden nung district kübok Assembly Constituency 10 prongla nungi president-tem aser general secretary-tem dena liasü.