Mkg District nung 144 CRPC ozüng agütsür

Kohima, Tsüklai 25 (TYO): Mokokchung district kübok tesem kar nung election dak sendakba mepetmesü lendongtem atalokba ajanga District Administration-i tanü nungi district ajunga nung Arrla 144 CrPC ozüng alitsü sangoktsüogo.
Iba ozüng ya Tsüklai 25, 2018 nikongdang 4:00 ako nungi tenzüker Tsüklai 28, 2018 anogo tashi alitsü.
Iba ozüng kübok nisung 5 dak tema adenshitsü mesüra senzütsü memelar aser prangpong injang, lung, süng, tapoktsü mesüra item mesükba osettem bener senzütsü memelar. Iba ozüng nung aibelenertem IPC nung Arrla 188 kübok temerenshi alitsü.
Iba tenokdangba kübok election, law & order aser nüngdakba services nung shilem agiba sorkar ketdangsertem madener.
Küptoknü Chungtia yimtsüng nung NPP candidate pusemer ana injang agi yiru. NPF aser NPP züngsemtem tsüngda raradang tena yiru.
Election anogo matongdang tensa raksatsüsa mapa inyaktsü akok ta bilemba agi tanü nungi Mokokchung district ajunga nung Arrla 144 CrPC ozüng alitsü tetuyuba agütsü, ta Chief Electoral Officer (CEO) Nagaland, Abhijit Sinha-i ashi.
Mokokchung district kübok election dak sendakba mepetmesü adokba sülen Arrla 144 CrPC ozüngji mezüng Tuli nung agütsü aser iba sülen Longkhum yimtsüng nung agütsü.
Tanü nungi Mokokchung District ajunga nung 144 CrPC ozüng alitsü aser Longkhum, Chungtia, Chuchuyimlang, Tuli o Aliba tesemtem nung lendong ataloktsü akok ta ajitetba agi State aser Central security personnel peria mapa lemzüktsüogo, ta Abhijit Sinha-isa metetdaktsü.
Naga nunger telungpurtemi election nung ozüng alema mapa inyakba nung shilem agir asü koda ta osangbeneri asüngdangdang “Longkhum nung NSCN (IM) züngsem kati shilem agiba indang osang angashiba dak alaka, kanga dang tesüngmangtsüka Naga nunger telungpurtemi election dak sendakba ken o nung densema mali” ta CEO-i langzü.
Onoki Central Armed Police Forces (CAPF) indang company 250 dak tema den 13 Battalion 13 tashi mapa lemzükja lir. Anungji security dak sendakba atema tebilemtsü kecha madoktsü ta imlar, ta paisa shisem.
Maneni, AR jawan temi international border kanga junga nüka mitdar, ta Abhijit-isa ashi.