Mkg Div NPF-i Aor legislator den telungjem senden amen

Mokokchung, Dec 12 (TYO): Naga People’s Front Mokokchung Division-i ayongzüka division office nung Honibarnü Mokokchung district nungi adoker Aor legislator-tem den telungjem senden tajung ka menogo. Iba senden nung MLA Imkong L Imchen dak alaka tanga tanüng yimsüsür ajak liasü.
Iba senden nung Mokokchung Division NPF-i Congress MLA asem NPF-i meyiper Dy. Speaker NLA Imtikümzük Lkr, Parliamentary Secretary for Tourism C.Apok Jamir aser Parliamentary Secretary for Geology & Mining Dr. Imtiwabang parnok ajak pela agizükba den parnok nem tetushi agüja liasü.
Iba senden nung Mokokchung Incharge NH, Mechanical & Election minister Nüklutoshii mapang tatsüka agia jembidang, “iba telungjem senden ya otsüsütsü mapang ka lir”, ta metetdaktsü.
Paisa khuret kar lemsatepdang, “Ao kini kechi jembir/ashir ta tanüngba Naga kintemi atar, Tsüngremi Ao kin nem maongka jenti agüja lir, yamaji asenok khuret tulu lir aser iba khuretji asenoki bentettsüla”, ta paisa tayongzükba ka agütsü.
Naga yimten tebilemtsü onük indang jembidang, “iba wadang dak sentakba nung Ao kini lenmang tajung kar tuyutsü nüngdaker” ta paisa ayongzük. Paisa iba dak sentakba nung “anemsü meteni temeim alitsü” asoshi külem lennirtem ajungshia liasü.
Parliamentary Secretary C. Apok Jamiria mapang tatsüka agia jembidang, onok congress MLA 8 DAN government nung denogo aser ibai nübur atema onok lungjemer, anungji, “nüburtemi meratatsüla”, ta ashi.
Kasa senden nung teloki bangzüng ana renema ayu. Ibaji mezüngbuba nung, Nagaland Chief Minister TR Zeliang aser NPF tir & DAN mendenbuba Dr. Shurhozelie lenisüba kübok Nagaland nung party ajak ka küma opposition maliba sorkar ka kümdaktsüba asoshi akhümtsübu aser tenüngsang agütsütsü lemtet.
Tanabuba nung, NPF Mokokchung Division-i Mokokchung district nungi Congress MLA-tem NPF party nung züklokba asoshi pela agizükba den Division Incharge, Minister Nüklutoshi lenisüba kübok maneni tashi ita aotsü lemteta yuogo.
Senden nung Parliamentary Secretary Amenba Yaden, Working President NPF Central office Apong Pongen, Mokokchung Division tir Moasangba Jamir parnokia tepela o den tayongzük o balala jembia liasü.