Mkg, Dmr, Mon nung Arms License atema sangdonger

Dimapur, December 13 (TYO): Taruba Legislative Assembly Election Nagaland 2018 atema General election dak sendakba nung Mokokchung district kübok arms license alir ajak dang December 23, 2017 anogo matongdang verification atema pei indang arms license ji police stations nung sayutsü metetdaktsüogo.
Mokokchung Deputy Commissioner, Sachin Jaiswal-i, iba anogo tashi nung verification atema license ji mesayura ozüng kübok tapet section nung ajemdaker item license(s) ji agientsü, ta metetdaktsüogo.
Ano tanga sangdong ka nung Commissioner of Police, Dimapur-i District kübok Arms Licence alir ajak dang December 22 matongdangsa Police stations nung verification atema arms license sayutsüla, ta metetdaktsü.
Maneni Mon DC & DEO, Thavaseelan K, IAS-i sangdong ka ajanga, General Assembly Election 2018 dak sendakba nung Mon District kübok arms license alir ajaki December 23, 2017 anogo matongdang anasatiba Police Stations nung verification atema pei meyong arms license sayutsü metetdaktsü. Iba anogo tashi nung verification atema license ji mesayura ozüng kübok tapet section nung ajemdaker item license(s) ji agientsü, ta paisa metetdaktsüogo.