Mkg Dobashi-i züluba “Aor Temzüng Ozüng” kaket sayaogo

Ao Senden nung taoba tir, Prof. Sangyu Yaden-i “ Aor Temzüng ozüng” kaket ka District Customary Law Court, Mokokchung nung sayatsüba noks anung angur. Aug. 23,  2016.

Mokokchung, Aug 23 (TYO): Mokokchung District Dobashi-i züluba “Aor Temzüng Ozüng” kaket ka Mungulbarnü yangi DB Customary Law Court Mokokchung nung taoba Ao Senden tir & Nagaland University nung tesayur Prof. Sangyu Yadeni akhümketa sayatsüogo.
Iba kaket ya shilem pezüsü küma zülua lir. Mezüng shilem nung ‘Aor Putu tarensen aser loktiliba’ indang shia lir. Tanabuba shilem nung ‘Aor temzüng ozüng balala’ indang shia lir. Tasembuba shilem nung ‘temzüng ozüng nung aibelenba temerenshi’ indang aser shilem pezübuba nung Aor tzükong shia ‘kibalemburen’ indang shia angutsü.
Prof. Sangyui iba kaket sayaja mapang tatsüka agidang, Naga nungerji sobaliba temzüng ozüng shitak benshiba kin ka ta reprangteta British aser India nungeri Naga nunger sobaliba aser tsüzüng ozüngtem kümzüka aser wazüka ayutsü asoshi ozüng balaka lateta yutsü, ta ashi.
Küm aika Aor temzüng ozüng kaket küma madokteti tebang agidang belentepa aru, aji oda, tanü asangsang nung kaket küma adoktetba ya Ao kin otsü nung takok tulu ka lir, ta paisa Dobashi pur dang pelaba olen ka metetdaktsü.
Iba kaket adokba ajanga “Aor temzüng ozüng tali takangba, tajungba aser lokti nung ochi obendang alitsü imlar”, ta paisa moatsü.
PA to DC Temsümereni kaket adokba nükjidong ashidang, akhi asen tsüraburi mulungzüng agidang temzüng ozüngtem benshia aru, aji saka, tanü itemji samaa aoba ngua tarutsü lanu putu asoshi ibai tongtibang asütsü ta shisadanger Dobashi-temi iba kaket adoktsü lemtet. Iba kaket ya Ao kin tzükong trok sanger den shisa agiteper züluba lir, ta paisa shisem.
Mokokchung Town Baptist Arogo, Assoc. Pastor P.Toshii iba kaket meshiteta sarasademtsü. Sentong nung Ao Senden tir, Imolembai tayongzükba o tulu bener arua tesentepertem ayongzük. Iba sentong nung Limanungsang (DB) menden liasü aser District Hd. DB Chubatoshii tarurtem pela agizük aser PA to DC Zülunungsangi mulungnen o shia sentong tembang. Tanü iba sentong nung Ao Sendeni anir tzükong shia nungi ketdangpurtem arua aden.
Iba kaket ya Mokokchung Dobashi Court nung senpak 150/- agi talitsü angutsü.