Mkg doctortem-i junga inyakogo

Imkongliba Memorial District Hospital, Mokokchung nung inyakertemi parnoksasa bendenba Welfare Fund nungi shirangertem asoshi Digital X-Ray Machine alia amenokbaji meimlaba mapa tajung ka inyakogo. Iba osang angashia tashidaka ajak anepa pelar. Tanü Nagaland nung tanur tain ajaki ‘Ochimashi’ mapatem indang kanga jembir. Primary school nung azünger asen chirnurtemia asenok dang, kechiba asen lima nung yimsüsür aser tulurtemi ochimashi mapa inyaker ? Nagaland nungbo ochishia inyaker yimsüsür aser ketdangsertem kata malia na ? Kechiba Nagaland nungbo yimsüsür aser tulurtemi sensaker aser onok ama tanurtem memeimer ? Kechiba sorkari asenok asoshi school aser mozü ki junga anepalu mesütsür ? Kechiba doctortem mozü kidangi marur (?) ta parnok tsüngdang asenok tekolak angüma matutettsüsa asüngdangba mapang ka nung, asenok telangzütsü kabo akatsüsa tang Mokokchung District  mozü kidang inyaker doctor-temi inyakogo. Nagaland nung tanü mapangba ya pei sen agi nübortem asoshi mapa tajung inyakba putu masü saka nübortem meyong tagitarutsü ajak menakrepa chitsüba putu lir. Iba ama putu mapang ka nung doctortemi parnok Welfare Fund nungi sen lakh ter tashi agi tashidak tendangba X-ray machine aliba jagi nübortem nem teimla tuluka agütsüogo. Iba ama mapa tajung jagi alima nung majunger aser ochimashir aika aliyongbo nübortem meimba purtema ishikabosa lir ta kuli tajung ka sayur. Atangji, alima yanglutsü asoshi nisung tajung aika menüngdaker. Majunger aika aliyongbo tajunger ishikati pei kija atema rongsen rezüngtsü mebilemi nübortem asoshi tezümedangi mapa tajung maneni inyakra, iba jagi tamajung aser ochimashiba mapatemji kokadoktsü. Majunger aika alidak tajunger ishikati mapa tajung inyakbaji amang tanak nung temo milen tilaka tsükloker sangwadaktsütsü merangba amai lir. Aji oda, temo milenji mali küma rongrepa aluba tesangwa agi amang tulujia kokadoker. Tanü asen lima jungnüseta majungba ya nisung tamajungertemi tamajung inyakba agi masü saka nisung tajungertemi tajung meinyakba ajanga lir. Iba tangatetba nung Mokokchung district mozü kidang doctor ishika longjemer nübortem asoshi mapa tajung inyak tenzükba jagi Mokokchung district dang masü saka Naga lima ajaklen  sangwadaktsütsü imlar. Alima nung mapa tajung inyakba rongnung shirangertem asoshi temeim sayua anepalua yariba mapasa tuluba asütsü. Iba mapaji IMDH Mokokchung nung doctor-temi tenzükogo. Iba jagi doctortemji dang masü saka asenok ajak tangar tsüngdang tenüng tajung agir. Aji oda, tanga mozü kidang anepalutsü makokba shirangertem Mokokchung district mozü ki bushia yokba jagi Mokokchung district aser Ao kin tenüng atutsü. Tang ya tangari Nagaland nung lenmang tajungtibaji Mokokchung district ta jembir aser aji shitakba. Iba sülen ano tang Nagaland nung mozü ki tajungtibaji IMDH Mokokchung lir ta jembitsü imlar. Aji oda, Kohima aser Dimapur nungi dena taneptsü bushia Mokokchung mozü kidangi arutsüsa tang doctortemi inyakba denji pusema asenok ajaki peii akok shilem kakabosa inyaktsü senso ajaki bilemtsüla. Kibong mesüra telok kari ano mozü kidang nüngdakba osettem alitsütsü, kari kiojen yanglutsütsü, kari mozü kidang inyaker ajak tonga oagi sarasademtsütsü, kari mozü ki aser kima janaa ngura merüktsütsü, sali achirtemi mozü ki kima aser kilong nung sali metsü memetsütsü, anungji mozü ki toktsür mao tashi Sali aser moko machitsü  aser ano mozü kidang metsümeshidak amshir tzü agi jungjunga shidoker yutsütsü ta pei pei akokba mapa nung asenok ajaki Mokokchung Distict mozü ki ya Ao lima nung lapokba asenok ajak meyong mozü ki ama bilema anepalura,  asenok district mozü kidangji kotak tenyar alua alir ama akümtsü. Atangji, Nagaland nung alir doctor aikati ochishia aser temeim agi shirangertem kanga junga anepalur. Ajisüaka, parnok ajakji ajateta IMDH Mokokchung nung inyaker doctortemi inyakogo. Kanga junger !