Mkg DPDB-i Centre dang Coaching institute lapoktsü abener

Dimapur, June 7 (TYO) : Union Minister for Tribal Affairs, Jual Oram-i nangzükba nung ajemdaker Mokokchung District Planning and Development Board (DPDB)-i Ministry of Tribal Affairs, (GOI) dang Mokokchung nung Coaching institute ka lapoktsü atema tezüluba ka yokogo.
May 7, 2016 nü ADC (Planning) indang conference Hall nung DPDB senden amendang züngsemtemi iba tezüluba agütsütsü bangzünga renem.
Iba senden nung mendenji Commerce & Industries Parliamentary Secretary & Mokokchung DPDB Chairman, Amenba Yaden liasü.
May 5, 2016 nü Mokokchung district kübok Kangtsung yimtsüng nung Moatsü benjung amungdang Union Minister for Tribal Affairs-i Skill Development Scheme kübok Mokokchung jila nung coaching institute ka lapoktsü nangzüka liasü.
DPDB senden nungsa Changtongya circle kübok Treasury Office nung mapa inyakertemi timtem ajuruba onüktem benoka lemsatep. Changtongya nung aliba Treasury Office ji non-banking Treasury ka lir aser iba ya Banking-Treasury ka kümdaktsütsü atema bangdakpur dangi abentsü lemtet.
Senden nungsa MNGREGA convergence fund melena LADP 2015-16 schemes agizüka ayu aser Head Start Montessori School, Tuli nem grant-in-aid aser MS Anaki yimsen nungi GHS ajungkettsü mulunga agizük.
Senden nung Er. Yanger Pongen, Executive Engineer, PHED, Executive Engineer, NH-2 Mokokchung Division, Er. Chubatoshi, DVO, Dr. Mapumeren aser tanga Heads of Offices-i parnoki teinyakdak mapatem indang osang lemsatep.
Tanü DPDB chairman, Amenba-isa Mokokchung jila küm 125 ajungba nüngtem nung Commemorative Album ka sayatsü aser Committee züngsemtem nem tenüngsang agütsüba kulikakettem lema agütsü.