Mkg DPDB senden nung anema-alibaren onüktem jembi

Mokokchung, Aenjeti/January 13 (TYO): January 10, 2020 nü Conference hall, ADC (Planning), Mokokchung nung January ita atema Mokokchung District Planning and Development Board (DPDB) senden menogo, ta tanü ketdangsertem osang ka ajanga metetdaktsü.
Deputy Speaker NLA aser Chairman DPDB Mokokchung, Sharingain Longkumer leniba nung amenba senden nung Higher Education & Technical Education, Tribal Affairs, Nagaland Minister, Temjen Imna Along-a aden.
Küm tasem salem lemsatepa Chairman-i Board züngsemtem dang, 2020 küm ya district nung temelenshi tulu adokdaktsütsü atema longjemer inyakba küm ka asütsü, ta metetdaktsü.
Paisa züngsem ajak dang district nung maparen ajak tiptema inyaktsü atema shisa-obang ka ser longjemer inyaktsü ayongzük.
Kasa senden nung district nung anema-alibaren dak sendakba onüktem nung o lemtepba mapang tang District Hospital (IMDH) jenjang atema-a süoka jembidang tekaraba nung reprangshia inyaktsü atema lemtet.
Chairman-i Medical Superintendent (IMDH) dang iba Hospital inyakyim osang tejangja agüjang aser Hospital nung rongdak nüngdakba osang taruba DPDB senden nung metetdakjang, ta metetdaktsü.
Senden nungsa Fazl Ali College nung National Assessment & Accreditation Council 3rd cycle atema senotsü teyari atema o lemtepba mapang nung Higher Education & Technical Education, Tribal Affairs Minister, Temjen Imna Along-i, Fazl Ali College ya autonomous akümtsü mapang tongogo, ta ashi.
Tanga district tem nung sensotemi tenla balala agütsüba atishia Minister-i Mokokchung district nung aliba nüburtem dang iba college ajungkettsü atema lenmang balala ajanga tenla agütsütsü ayongzükba den külemi DPDB züngsemtem danga iba college ajungkettsü atema peii akokba tenla agütsütsü mepishi.
Taoba DPDB senden nung lemtetba onüktem reprangshiba mapang nung Tuli Sub- Division kübok Wameken yimdak Sub-Centre ka rongdak lapoktsü atema lemteta sorkar matsüngdang benokogo.
Nodal Officer, ABPMJAY (Ayushman Bharat), Dr. Sentila-i Power Point ajanga Ayushman Bharat indang osang metetdakja liasü.