Mkg Driving School nung simulator amenokogo

MTBA Assoc. Pastor, Sentimeren-i Mokokchung Driving School nung Advance Driving Simulator kol meshiteta sarasademer lapoktsüdang tangokba noksa nung angur. Mokokchung, January 13, 2019.

Mokokchung, January 13 (TYO): Gari shizüknürtem atema osang tajung kaji Mokokchung Driving School nung Jan 13 nü gari ani melamela angazüktsü atema “Advance Driving Simulator” ta sür kol ka amenokogo. Mokokchung Town Baptist Arogo (MTBA), Associate Pastor, Sentimeren-i iba simulator kol meshiteta sarasademer lapoktsü.
Tanü amenokba simulator ya nüngtugu ADH Labs company indang lir aser ibai Nagaland nunga aikabo mali aser Mokokchung nungbo mezüngbuba asütsü, ta osang angazüker.
Mokokchung driving school ya 2015 küm tenzük aser küm pungu tsüngda nung iba school nungi tang tashi nung nisung ajak senteperbo meyi ka jungnüa nem gari anitsü training agütsüogo.
Küm pungu tashi iba driving school tenzüker arudang nüburtemi lenmang balala ajanga nungita yaritepba asoshi pelaba den ano iba school tajungtiba aotsü atema maneni yaritepdaktsünür, ta Mokokchung Driving School, kibur Yanger Namoi mepishia metetdaktsü.
Iba school nung driving course-ji hopta asem (3 weeks) atema lir aser iba course ajak atemaji sen 4500/- dang agir. Iba school ya Govt. High School, Dilong anasa lir. Iba simulator ajanga gari anitsü shizüknürtemi gari melamela ashitsü.