Mkg Electrical Div E.E ajanga sangdonger

Mokokchung, Aenjeti 30 (TYO): Mokokchung Electrical Division kübok light agirtemi light tashi talila atsükba ajanga mapang shia transformer nung timtem adoker, ta tanü Mokokchung Electrical Division, Executive Engineer, Er. Lobosang Jamir-i sangdong ka ajanga metetdaktsü.
Iba ya tongtibangsa electric heater, induction cooker, aser talisa nokdanga aliba oset (prohibitive load intensive heater coils & appliances)-tem amshiba ajanga nungi teimba adoker, item oset ajanga transformer tashi maiti kümdaktsüba den kol raksatsür, ta paisa kuli kar ashi.
Tang aliba amai dang benshia ora, Mokokchung nung transformer ka sülen ka ta raksayonga aotsü ana nung lir, ta paisa tekümdangtsü olen ka shisem.
Item kulitemji ajanga Aenjeti (Jan) 29, 2018 nüto D.C office anasa aliba (Sangtemla Ward nung) 100 KVA transformer ka raksa. Iba transformer nung jagi D.C office den government office teimbaka aser kibong dokan kar densema light agir.
Transformer ya sen kanga tasak, aji dang masü melamela anguba oset ka masü, aji oda, akok tashi raksaa aliba transformer-ji tekaratiba nung melentsü merangdaki, saka mapang tera agitsüa akok, anungji, raksar aliba tesem nung consumer-temi aremzüka atatsü asoshi kasa sangdong nungsa mepishia metetdaktsüogo.