Mkg Electrical Div. EE-i MTLT dang mepishir

Dimapur, September 08 (TYO): Mokokchung Electrical Division, Executive Engineer, Er. Moa Aier-i sangdong ka ajanga, yashi Mokokchung Town Lanur Telongjem (MTLT)-i Power Minister, Nagaland nem shidi agütsüba pela agizüker, ta metetdaktsü.
August 26 anepdang Mokokchung Power House nung 33/11kv 5MVA power transformer raksa, aser tia makai Central Store Dimapur nung teraksa melentsü atema transformer talila maliasü, ibaji ajanga idangyongjisa memelentet, ta Er. Moa Aier-i sangdong nung shia lir.
Iba mapang Dimapur nung kasa capacity transformer ka teyangludak liasü. Iba transformer nung windings mapabo temer liasü aser heating mapa teinyakdak liasü. Iba ama transformer heating asütsü atema tsüngsang mopung apir hopta asem shi agir, aser iba maparenji Chief Engineer (Power)-i ashiba ama September 13, 2015 nü tembangtsü, ta Er. Moa Aier-isa metetdaktsü.
Yashi metetdaktsüba ama iba sülen transportation atema ano anogo ananü agitsü aser tsüngsang jungra installation den Commissioning atema ano anogo ana agitsü, ta paisa shisem.
Item onük angateta nübortemi aremzüka atatsü mepishir kechiyong Electrical Division, Mokokchung-i iba khuret asoshi mapa talila inyaktsü tashi mali ta Mokokchung Electrical Division, Executive Engineer-isa mepishia ashi.
Dimapur nung transformer yanglushiba maparen tembangba sülen transformer melentsü atema Division nung ketdangsertem aser staff tem renema dang lir, ta paisa sangdong nung metetdaktsü.