Mkg HG & CD Dist. Commandant Watilemba den tepila sentong agi

Mokokchung, October 09 (TYO): Mokokchung District Commandant Home Guards & Civil Defence (HG&CD), Wb. Watilemba den tepila sentong ka HG & CD office Mokokchung nung temenungratsüka agiogo.
Iba sentong nung Watilembai jembidang, pa Mokokchung nung küm 20 tema inyakdang külem officers-tem den lenla balala nung staff pur ajaki amalitepa aser nungita yaritepba asoshi pelaba lemsatep.
“Kü mapang Mokokchung district nung kechi mapasa takok ngua inyakogo, itemji ni ajungba agi masü saka nenoki nentaka aser meranga inyakba ajanga lir, anungji, nenok ajak nem tenüngsang agütsür”, ta pai pelaba ashi.
“Meimchir dang asünung, shinga tabensaba mali, anungji, mapa takok ngunüdang khenkhenbo nenoki maginütsüsajia inyaker alitsü aser kü jakla yimya ajanga nisung kar danga yiruja lira, yimlibilema tai tokangma”, ta paisa mepishia ashi.
“Kü melena Commandant shiba arudir, pa denjia kasa nenoki koda kü den amalitepa aser yaritepa aru, yamaji timi benshidaktsünür”, ta paisa inyakdaktsünüba olen ka shisem. “Nenoki kü teyari kodang nungdakdir, ajak nung yariteptsü mulunga lir”, ta paisa shisem.
“Mokokchung nung küm 20 tema inyaka arudang, jangratema tenzükogo, item ajakji staff pur lungjema aser putepa aliba ajanga lir, ni sorkar mapai ir külen mapang talangtiba tenzükbaji Mokokchung nung lir, anungji, ni kodanga mamatoktsü aser teti menungraa bilemtettsü”, ta ashi.
Tangjia kanga junga inyakdar, iba den ano mera tali agia “Mokokchung HG & CD” ya Nagaland nung tajungtiba ka kümtsütsü aser tangari züngshitsüsa ajaki pei mapa nung meranga aser nentaka inyaktsü asoshi paisa tayongzükba ka agütsü.
Tanü iba sentong nung Company Commander, P. T Jamir menden liasü aser Mokokchung HG & CD kübok aliba Women Cell, Static Posts, Traffic, SDRF, Security Guards, Staffs aser officers nungi meyongertemi tepila o tatsütsü jembia liasü. Watilemba ya promotion nung Senior Staff Officer ka ama Kohima-i posting aor.