Mkg IDBI bank nung ‘Customers Day’ sentong aka

Mokokchung, June 7 (TYO): IDBI Bank Mokokchung Branch-i “Customers Day” ta sür Bank nung inyaker aser customer na tsüngda sensaksem sentong tajung ka parnok bank nung ayongzüka kaogo.
Iba sentong ya tongtibangsa banker aser costumer-tem tsüngda tesendaktep akangshiba den nüburtemi bank maparen aser yimya tali angajemdaktsütsü nükjidong yur ayongzükba lir, ta Mokokchung IDBI Bank branch manager Wt. Zülusenla-i ashi.
Bank ka takok ngua aotsü atemaji aroki shilem agiba ajanga dang nükjidongji ataloktsü, anungji, medokmeperibatem aser iba bank tajungtiba bener aotsü asoshi nüburtem nungi shisatsü maneni nüngdaker aser marendaki lemsateptsü asoshi laisa ayongzüka liasü.
Mokokchung nung IDBI bank tenzüker küm pezübuba lir, aji oda, nübur nem akokba tashi service tajungtiba agütsü meranga arudaki, tanü tashi arudang nüburtemi amalitepa nungitba asoshi laisa pelaba olen ka shisem.
Iba sentong nung Mokokchung IDBI Bank Branch Manager Wt. Zülusenla-i anir par külem inyakertemi, e-banking (digital banking), loan tapu balala aser item indang tetemlok (interest), sen ayuba yimya (savings & fixed deposit) tapu balala aser interest-tem, card tapu balala aser cheque book amshiyim, item indang kanga junga rateta shia liasü.
Sentong nung adener customer-temi bank maparen dak sentakba nung merajemba onük aika asüngdang aser itemji IDBI nung inyakertemi rajemtsü. IDBI Bank-i iba ama sentong tajung ayonga customer-tem den sensaksemba ya jangratemtsüka lir, aji oda, tarutsü nunga iba ama sentong ya akatsüla, ta IDBI customer aikati pelaba lemsatep.