Mkg Inter-Club Badminton Championship tenzükogo

Mokokchung, Mongputeni/Oct. 19 (TYO): Mokokchung District Badminton Association (MDBA)-i küm shia ayongzükba asembuba Mokokchung Inter-Club Badminton Championship Mongputeni/October 18 nungi tenzüka yangi Indoor Badminton Stadium Mokokchung nung asayadaki.
Taküm iba asayamung nung club 7-i shilem agidar. Taküm iba asayamung shir teloki mezüngbuba takok ngudir, parnok nem kuli kaket den senpet sen 50,000/- aser tanabuba jenjang angur nem 30,000/- agütsütsü. Iba asayamung ya Mongputeni/October 19 tashi asayatsü.
Iba asayamung tenzükja Nagaland DGP, T. J. Longkumer IPS-i mapang tatsüka agia jembidang, tangar dang alakteta asayar saisaponger tajung ka jagi saisapong nung dang masü saka tanga taküm lenmang balala nung takok ngua oteter aser timi liteter, ta saisapong asayaba tajangzük aser tongtibang indang ashi.
Tanü putu nung saisapong ya kanga tongtibang luyim ka küma odaki, anungji, “tsüraburtemi lanurtem saisapong tsütsü ajungshitsüla”, ta paisa inyakdaktsünüba o ka ashi.
Taoba mapangbo North-East nung Nagaland state ya saisapong tsütsü tajungtiba liasü, tetezü iba jagi asenok dak sempet aser tashi aliba sayur. Anungji, “tezü metangi asayatsüla”, ta paisa ayongzüka liasü.
Asayar ka atema coaching ya kanga tongtibang lir, anungji, lanurtem coaching maparen atema akokba tashi yaritsü, aser sorkar den tongtepratepa lenmang kar bushitsütsü ta paiashi.
Sentong nung Tournament Convener Er. Yanger Pongen, MDBA tir Tiapokba aser Chief Referee Molung Aier parnokia shilem balala agia liasü.