Mkg küm 125 ajungba tenüng nung tsüngsang

Mokokchung, Nov. 7 (TYO) : Mokokchung town küm 125 ajungba den külemi Mokokchung district administration aser Mokokchung district art & culture council (MDACC) akhüm nung Lodestar teloki Nagaland open tsüngsang tetoktepba “Dance Prodigy Competition” ta ser sentong ka yangi town hall nung ayongzüka liogo.
Iba sentong nung telok 15-i shilem agi. Sentong nung MLA Meretoshi R Jamir tongti tesemdanger liasü aser pai mapang tatsüka agia jembidang, tsüngsangba ya wawa-menüba (entertainment) kisüng masü saka ibai tongtibang art ka lir aser ibai sobaliba nung kongsang ka lir ta ashi.
Tsüngsangba ya anema alitsü asoshi temang arakzütsü (exercise) maparen tajung ka lir ta pai ashi. Tsüngsangba ajanga tanü asen lokti nung rongsenkettsüng renlokba den mapa anguba nung shilem tulu agir ta paisa shisem.
Laishiba nunga kentenmenü aser tsüngsangba indang tekong aika nung shia angutsü. Tatishitsü agi, Yisu Yirusalemi aidang nüburtemi Pa nüngsang ken tena aser tsüngsanga agizükba indang ashi. Aji oda, tsüngsangba ya asenok tamajunglen masü saka tajunglen agitsüla ta shia tesentpertem ayongzük.
Alima nung tsüngsang tapu aika lir, anungji, asen sobaliba tsüngsang denji ano tensa den apet tsüngsang tasen bendena liromedema/meyoktepa moraloka aotsübaji kanga tongtibang ta paisa inyakdaktsünüba olen ka ashi.
Tongti tesemdangerisa lanurtem dang meranga inyaktsü ajungshidang, tsüngsangba ya ngujem tulu aliba luyim ka kümogo, aji saka, asenoki meranga meinyakra aser asen sempettemji mamshitetra ajakji amajok dang asütsü ta ashi.
Iba sentong nung Mokokchung R&B E.E Er. Chubatoshi tetushi tejaoker liasü. Rebels Crew, Louiz Punk Charlie, Temsüyabang, Lendipokla/Lejen’s Squad, Limayanger nungertemi shilem balala aiba ajanga tesentepertem peladaktsü.