Mkg Lotha hoho tenteter küm 50 jungogo

Health & Family Welfare Minister, Imkong L Imchen-i Mokokchung Lotha Hoho küm 50 ajungba nüngtem yangluba nüngo ka sayatsüdang tangokba noksa nung angur. Mokokchung, Nov 7, 2017.

Mokokchung, Nov 7 (TYO): Mokokchung Lotha Hoho tenzüker küm tenem (50) ajungba jubilee sentong ka Mungulbarnü yangi Mokokchung town hall nung “nurturing fate” omen dak rangloker meraketa agiogo. Iba sentong nung Nagaland Health & Family Welfare minister, Imkong L Imchen tongti tesemdanger ka ama jaoka munga liasü.
Imkong L Imcheni iba sentong nung jembidang, Lotha nunger o Aor na sobaliba, sobusolem, yar tsüngsang aser libaliru kanga mesükatepa lir, anungji, asenokji kibong ka nungi adianu amai dang lir, ta ashi.
1950’s mapang Lakhuti yimdak Naga National Council (NNC) mungdang alidang, azü metokshii raratsü, India nunger den amalitep malitsü aser nüjiso asoshi raratsü telemtetba tulu agia Naga national movement nung temelenshi ka adok aser ibaji asenok asoshi otsüsütsü ka lir, ta paisa ashi.
Lotha kin ya Naga nunger kin rongnung tongtibang aser tejangja kin ka lir aser Lotha nungeri Naga nunger asoshi shilem agibaji shisang-shisanger, ta paisa tenüng sanga ashi.
Mokokchung nung Lotha Hoho tentetba ya 1967 asütsü akok saka iba jakdang Mokokchung town akümba mapang nungi Lotha nungerji liasü, asenok ya akhi mapang nungi kidanger süa kibalembutepa aser shishilembatepa aru, anungji, asenok ya aener (stranger) masü, ta paisa shisem. Aji oda, taoba mapang aruba amaji tarutsü nunga külemi amalitepa aotsü asoshi, paisa ayongzüka liasü. “Asenok pilatsü makok aser tarutsü nunga maparen ajak nung külemi dang aotsü”, ta paisa shisem.
Paisa Naga yimden dak sentakba onük kar shioktsüdang, asenok asoshi election-ji tongtibangba masü saka Naga yimden tebilemtsü koba küm talangka melateti tepdaka lir, iba dakji rangloktsüla. Election-ji aruli oli asütsü saka Naga yimden tebilemtsü ya melateti yutsüra yamai dang alitsü, anungji, ajaki süoki ia agitsüla, ta paisa shisem.
1998 küm Naga nungeri election nokdangtsü merang saka menokdangtet, kechiba süra ibaji asenoki yimren nungi meinyakba ajanga liasü, ta paisa kuli kar densema ashi. Anungji, tang yabo union sorkar den kanga junga angatetteper ang election masü saka solution atema nokdaktsüla, ta paisa tebilemba ka lemsatep.
Naga yimden tebilemtsü atema jembitsür R.N Ravi-ia joko Naga yimden tebilemtsü dak sentakba maparenji tatemleni arudar, ta shiogo. Anungji, iba maoang kaji asenoki agitsüla, ta paisa shisem. Imkong L Imchen-isa jubilee nüngtem adokba kaket ka den mamadoktsüba nüngo (memorabilia) ka dena sayatsü.
Sentong nung tetushi tesemdanger taoba Secretary, Y. Mhonbemo Humtsoe-ia mapang tatsü agia jembi aser Mokokchung Lotha Hoho tenzüker Elias T Lotha-i taoba mapang atalokba menungra bilemtetba kar lemsatep. Telok balalai kentemenü, jilushi, yar tsüngsang aser sobaliba ken ajanga shilem agia liasü. MLH chairman Nyamo Z Yanthan-i tarur ajak pela agizükba den jubilee planning committee tayonger Dr. Phypben Odyuo ajanga tepela o lemsatep.