Mkg. mozüki nung teinyaker peria maliba anema AKM-i lokti senden ayonga aka

Ao Kaketshir Mungdang-i ayongzüka Imkongliba Memorial District Hospital (IMDH) Mokokchung nung Doctor  aser tinyakertem peria maliba dak ajemdaker tejashia sayua Public Rally sentong ka ayonga agiba mapang tangokba noksa angur. (Mokokchung, March 15, 2025)

Mokokchung, Metsüremi/ March 15 (TYO): Mokokchung Police Point nung tanu Ao Kaketshir Mungdang-i ayongzüka Imkongliba Memorial District Hospital (IMDH) Mokokchung nung Doctor  aser tinyakertem peria maliba dak ajemdaker tejashia sayua Public Rally sentong ka ayonga kaogo.

Iba sentong nung Ao Kaketshir Mungdang Tir Sb.Lanutoshi Aier-i jembidang küm aika tejaklen nungi nüburtemi IMDH nung doctor peria maliba dang jembia aru, saka IMDH nungya doctor dang masü saka teinyakera(Medical staff) peria mali, anungji Ao Kaketshir Mungdang-i item timtemji reprangteta anaben tashi department nem tezüluba nung agütsüogo, saka tanu tashi nungtakba peria agüja malita ashi.

AKM Tir-isa  March 14 nü Mokokchung Deputy Commissioner kidang IMDH maparen dak sentakba nung senden ka Medical  Department nungi luden züngsem pezü(4) arua Ao Senden,Watsü Mungdang aser AKM ta menogo, osang kaket balala nung iba senden dak sentakba nung telemtetba agizüka ayuba adoka lir, saka AKM-i IMDH nung nungtakba aser takhangba ya tezüluba nung tejangja magütsü tashi hai haura masütsüta shir senden tom nung ayazüka alu, AKM-i iba senden telemtetba kecha nunga meyongnem agüja mali,saka  iba senden nung adener züngsem meyongnem agütsüba nungbo denogota adenshia aliba nüburtem nem jangja jangajaa metetdaktsü.

Imkongliba Memorial District Hospital nung doctor malibaji Nagaland Public Service Commision(NPSC) agir agütsütsüta ashi saka NPSC küm 4, 5 tashi magi arur süra NPSC magi tashi Mokokchung hospital-bo kasa tia nung timtemtsü,2021 küm Medical Officer atema NPSC post 21 adoka tatidang agiogo, court case balala indang department-i kuli balala bener arur, saka court case-ji kodang atemtsü asenoki memetet,court case atadang asenok nübur komaka timtemtsü, government-ia item temtem ajak ya meteta yur kechiba parnok teinyaktsü meinyakerta AKM takhangba lir ta AKM Tir-isa ayimoktsü.

Kohima,Dimapur aser Mokokchung hospital  ya category kasa lir asenoki Dimapur aser Kohima denji kasa meshir masü, 150 bedded hospital nung doctor 24 alitsüla ta asübaji akhanger masü, saka tendak nungtakba meshir, anungji asen merumeruba mali,tanu ama dang IMDH jenjang ya ora asenok koda asütsü, tanu AKM-i IMDH maparen asoshi mezüngsüa iba sentong ya ayonger,  nübur taginüba matalokra AKM-i ano maneni inyaktsü, anungji nüburtemi AKM nungitdaktsünerta AKM Tir-isa metetdaktsü.

Sentong nungsa Ao Senden Tatong Tir Wb.Aowati-i jembidang 2024 küm  Ao Senden menden meleteper kelen Ao Senden-i  IMDH semdangdang IMDH nung timtem alibatem reprangtet ano aji dang masü saka    Mokokchung district kübok outpost-tem nunga doctor 8 tashi maliba ngua RTI-a anaben tashi züluogo, Ao Senden-i  yamaji inyakaka takok monguteti alidang AKM-i iba amai tasü ita nübur asoshi inyakba asoshi tepelaba metetdaktsü.

IMDH ya Mokokchung asoshi dang masü saka temeket aliba district-tem nungi shirangertem arur saka service junga magütsüteter,iba mapang nung tangari Ao pioneer-bo  ya tashi na ta asenok jenjang ngua süngmangtsü, anungji AKM-i noktakba ya kanga dang tim inyakerta  Ao Senden Tatong Tirisa adenshia alirtem den lemsatep.

Watsü Mungdang Tir Wt.S.Arenla Lkr-ia mapang tatsüka agia jembidang AKM-i IMDH asoshi khuret süa iba ama sentong tongpo apua inyakba ya nüburtem asoshi kanga dang temoatsü, anungji nübur ajaki AKM nungitsüla, Nagaland nung IMDH ta maozüki tejentiba ka lir, shitakbabo iba hospital yabo joko national aser international jenjang nung ajungketer alitsüla, anungji tang ola adokba ya tim nung adoker IMDH nung dang masü saka out-post-tem nunga doctor peria malibaji asenok nübur asoshi kanga dang tesasatsüka lirta temelung shirangba o lemsatep.

Sentong nung taoba mapang AKM nung tenzükertem,tsükong balala nungi kaketshir lenirtem,kaketshirtem aser nübur aika adenshia aden.Tsüngremer lenisüba jazüka MTBA Pastor Rev.Ponen-i sarasademer sentong tenzük aser Ongpangkong Kaketshir Mungdang Tir Sb.Tongpangmangyang ajanga tepela o jembi aser AKM Tatong Tir Sb.Onenpong ketdangsüba nung sentong agia liasü.