Mkg nung 1 buba Master Shield Cricket trophy asayar

Mokokchung, January 27 (TYO): Mokokchung District T20 Cricket Federation (MDTCF) teloki yangi Imkongmeren Sports Complex nung 1 buba Master Shield Cricket Trophy tan January 28 nü nungi tenzüka taruba February ita 3 nü tashi asayatsü ayongogo.
Iba trophy nung amshitsü asoshi asayamong jung tanü Mokokchung SDO (C) Sachin Jaiswal IAS-i yangi Hotel Metsüben nung sentong tongmelang ka agia meraketa sayatsüogo.
Taküm mezüngsüa ayongba asayamong nung telok 10-i shilem agitsü asoshi tenüng züluoka lir aser item rong nung Dimapur nungi telok 1 aser Wokha nungi telok 2 densema aliba osang ka MDTCF ketdangsertemi metetdaktsü.
Iba asayamong nung tematiba jenjang angur champion aser tanabuba jenjang angur telok na nem tanga sempet den senpet sena sen 30,000 aser sen 15,000 agütsütsü renema lir.
Individual shilem nung takok angurtem nema sempet balala agütsütsü renemba osang ka tayongertemisa metetdaktsüogo.
“Tan asayamong ayongba ajanga lanurtem asoshi saisapongtsü sabang lapoktsüba den külemi, lenla balala nung tajangzük angutsü imlar,” ta MDTCF ketdangser kati ashi.
Mokokchung ADC, Rajesh IAS-i tan January ita 28 anepdang 9:00 ako nung lapoktsüba sülen iba asayamong ya Imkongmeren Sports Complex Mokokchung nung asaya tenzüktsü sentong renema lir.