Mkg nung 10 buba Inter – School TT asayamung akar

Tetushi tesemdanger Mokokchung Youth Resources Officer, Wb. K. Libemo Jami-i asayartem den salemyonga aoba mapang tangokba noksa nung angur. Mokokchung, August 7, 2017

Mokokchung| 07 August (TYO): Mokokchung District Table Tennis Association (MDTTA)-i ayongzüka 10 buba Inter-school Table Tennis asayamung yangi Multi-purpose Sports Complex, Mokokchung nung tenzükogo.
Iba asayamung tenzüktsür Mokokchung Youth Resources Officer, Wb. K. Libemo Jami-i jembidang, MDTTA-i iba ama asayamung ayonga TT asaya ajungkettsüba den lanurtem nem sabang lapokja toktepdaktsütsü maongka agütsüba asoshi pelaba mezüngbuba lemsatep.
Lenmang shitak nung asayartem asosh ibo sports ya tashi tulu aketba hadir amai ka lir, koba ajanga nisung ka taküm yanglushitsür, ta pai ashi. School-temi marendaki/menungnangi iba amala asayamung nung lanurtem ajungshia shilem agidaktsütsüla, ta paisa ayongzüka ashi.
Iba asayamung nung school balala nungi kaketshir 60 dak tema adenshia shilem agidaki. Iba asayamung ya August 08 nü tashi asayatsü.