Mkg nung 1st Miss Ao Nagaland 2016 sentong alitsü

Mokokchung : Tobur ajung tokteptsü jangrartem asoshi osang tajung kaji “Beauty with a purpose” omen nung ajemdaker tang mezüngbuba Mokokchung nung Lodestar teloki 1st Miss Ao Nagaland tetoktepba sentong ka August 5, 2016 nüji ayongzüka lir.

Iba tetoktepba ya tongtibangsa tobur ajungba maparen den Aor sobaliba aser oshioben, chiyungtsü, sobusolemtsü wazüka ayutsü aser asen takar sobaliba sayutsü nükjidong yur ayongzüker, ta Hogulbarnü Ao Kaketshir Mungdang senden kilem nung osangbener senden ka alidang, Lodestar tir Kr. Alem Imcheni ashi.

Iba tetoktepba nung takoker nem senpet sen den meimlaba senpet (gift hampers) agütsütsü. Ibaji dang masü saka Miss Ao Nagaland shiba adokdir lai Nagaland tenüng nung Miss North-East 2017 nung tedendangba magii indang indang shilem agitettsü (direct entry). Iba den ano takoker asemprongji Miss Luit 2017 nung shilem agitsü maongka angutsü, ta tayongerisa ashi. Ano Final Round (top 5) tashi aturtemji Itanagar Show ta ser Model Hunt sentong ka nung shilem agitsü maongka lapoktsütsü, ta parnokisa shisem.

Iba tetoktepba nung Aotsür aso/tar tajemba agi 5’3 (5 ft 3 inch) ser tema aser kiyi moi alir arishi küm 18 nungi 27 tsüngda alirtemi shilem alitsü akok, aser jangratemtsü kaji; iba show ya Ao oshi aser English anaprongla meyokteper agitsü, ta parnokisa ashi. Tsüngkong kar nungbo Kongru shima lir, parnokjibo asoajen (5’3) agi temsüa aser arishi küm (18-27) dang shitak lira tedendangba magii shilem agitettsü, ta parnokisa shisem.

Kasa tetoktepba nung sub-titles shimba maparen agitsü aser iba nungjia takoker nem senpet balala agütsütsü. Taküm iba sentong nung tongti tedendanger (chief judge)-ji; Miss Luit kibur Metha Sakia asütsü jaoka lir, ta angazüker.

Osang tajung kaji; Miss Ao Nagaland sentong nung tetoktepertem asoshi onük balala lemsar tesayuba aser shisatokden sentong balala katsütsü. Talisa Ao oshi, Aor sobusolemtsü, jayajako, jembishinü, yimyatsüya/wainshin, Aor soruchiokba yimya aser Aor on (indigenous cuisine) amala tesayuba balala agütsütsü tayongertem tebilemba aliba lemsatep.

Tetoktepertem atema khuret tera pongbatsüba kaji; sobaliba sobusolemtsü dak alaka tanga süoshi ajak teyaongertemi dang renemtsütsü, ta tayongertemisa metetdaktsüogo.

Iba dak sentakba nung tedendangba (audition) maparenji tan June ita 25 nü Mokokchung nung alitsü. Tejangrartemi shiyim (form)-ji Mokokchung nung Digi Printer Near Allahabad Bank, Assets near FAC Bus Stop, Lil’ Star Café (Kichutzar Complex) dokantem nung angutsü aser tanga district nung alirtemi osang tejangja agiteptsü asoshi iba mobile number (8014596281/8415827452/943600023) nung tongtepratep akok. Form maparen ajak June 18, 2016 tashi nungbo shibangadoktsü.

Iba sentong nung shilem agitsü atema tetokteper (contestant)-temji pei yimer nungi kuli tejangja alirtem dang agizüktsü, ta tayongertemisa metetdaktsü. Iba sentong ya telok balala den Avon Company-i tongti shilem agia yariteptsü, ta angazüker.