Mkg nung 21 buba Watsü Mungdang lokti senden akar

Mokokchung, April 27 (TYO): 21 buba Watsü Mungdang lokti senden sentong “Aowli Temelenshi” omen nung ajemdaker tanü yangi Mokokchung town hall nung meraketa tenzükogo. Iba sentong nung Watsü Mungdang telen balala nungi watsülartem noklang aika adenshia shilem agidar.
Tanü iba sentong nung tongti o jembir NPSC züngsem Wt. Chubala Wai-i, lokti nung temelenshi asoshi mezüngbuba pei jaklaliru aser mulungsentsü melenshitsübaji kanga tongtibang lir, ta metetdaktsü.
“Naga nungeri timtem tuoshi agia timi inyakba inyakyim maginür saka mapa ajak nung lenmang temelaba aser tezüpaba asa-a inyaktsü jangrar, ibayongji asenoki tangar memeneper”, ta laisa ashi.
Laisa shisaliok tsütsü onük kar lemsatepdang, “Naga nungeri education bushiba ya sorkar mapa inyaktsü nükjidong nung dang azünger, iba jagi shisaliok tsütsü temelenshi kecha madoker”, ta ashi. “Shisaliok bushibaji pei kisüng atema masü saka lokti atema bilema azüngtsüla,” ta laisa ayongzük.
Laisa temelenshi adokdaktsütsü asoshi watsü nem inyakdaktsünüba kar ashidang, tangar dak nendaka malitsüla, rongsen junga ketdang sütettsüla, aluyimba yimya melenshitsüla, science & technology ya Ao oshi nung meyipa züngdaktsütsüla, pressure group ka tenzüktsüla, timyim inyakba alitsüla, school tatem tashi mezüngi toktsür tetsürtem anidena parnok dang lenmang sayutsüla.
Ajak dak alia pei chirnurtem kaketriju tajung nung züngdaktsütsüla, kechiyong temelenshi bener aruba maparen nung shisaliokji tongtiret lir, ta laisa tayongzükba ka agütsü.
Sentong nung Watsü Mungdang tir Wt. Moachila-i tarur ajak pela agizük. Mokokchung SDO (C) Wt. Lemlila, Ao Kaketshir Mungdang tir Sp. Imkongwati aser taoba Fazl Ali College Principal Wt. Chubayangla nungeria tepela o den tayongzükba o tulu bener arua mungdangsanger ayongzüka liasü.