Mkg nung 44 AR-i veteran aser taküm bendanga agütsürtem nem tetushi agütsü

Dimapur, November 04 (TYO) : October 2016 tatemlen Headquarters 7 Sector Assam Rifles kübok, 44 Assam Rifles-i Mokokchung district nung aliba sepai tejentem aser linük asoshi taküm bendanga agüja asür sepaitem nem sentong ka ayonga akhüm aser tetushi agütsüogo, ta sangdong ka ajanga metetdaktsü.
WW-II veteran mapang adener Süngratsü nunger Retired Havildar (General Duty), Mering Ao nem Col B N Nayak-i tetushi agütsü. Arishi küm 96 tain, Meringba ya 1941 küm 3rd Assam Rifles nung sepoy ka ama Mokokchung nungi shim aser pa British Indian Army den külemi Burma campaign nung aden. 1942 küm pa “Victoria Force” kübok Myanmar Irawaddy ayongküm nung Japan  nunger sepaitem den rarar rongnung dena liasü. WW-II veteran, Meringbai gallantry award Ashoka Chakra (Class-III)-a ngua lir. Süngratsü yimtak, Village Council aser yimer ajak sendena lia pa nem iba tetushi tulu agütsü, ta sangdong nungji shia lir.
Ano Mokokchung district nungi linük asoshi taküm bendanga agütsür sepaitem nema 44 Assam Rifles temi asürtem azüngba school tem nung oa akhümtsübu agütsü. Iba sentong nung taküm bendanga agütsürtem indang tsüraburtem den school tesayurtem aser kaketshirtem dena liasü. Assam Rifles temi Mangkolemba Baptish Higher Secondary School nung Rifleman, asür Chubatemsu, Mayangnokcha Higher Secondary School nung Rifleman, asür Nokzar aser Molungkimong Middle School nung Rifleman, asür Martoba nunger nem tetushi aser akhümtsübu agütsü aser iba sentong ajaki kanga pela agizük, ta sangdong nungsa shia lir.