Mkg nung ‘Aowli benjungmung 2018’ meraketa tenzükogo

Aolemlai Aowli benjungmung lapoktsür külen stall balala sema jajaba mapang tangokba noksa nung angur.

Mokokchung, Luchii/Dec. 06 (TYO): Watsü Mungdang-i ayongzüka mezüngbuba ‘Aowli Benjungmung 2018’ sentong Brihostibarnep taoba Addl. Development Commissioner, Wt. Aolemla-i yangi Imkongmeren Sports Complex, Mokokchung nung meraketa tenzüktsüogo.
Lai iba benjung tenzükja jembidang, Watsü Mungdang-i iba benjung ajanga Aor sobaliba saya tapu balala kanga junga shisateta bener aruogo, iba ya ajanga tangazükba, sobaliba wazüka ayuba den lenmang aisü nung asentenshi adoktsü imlar, ta ashi.
“Asen tetsü teboui ochishia aser mapa meranga inyak, tanü aseni amangba Tsüngrem parnoki memetet aser parnoki Laishiba mazüng, saka par putu auyar maliasü aser asentzü sena inyaker chiyung,” ta laisa akhi asen tsürabur dak aketba sempet tajung tanaben asenoki asentenshia amangtsü asoshi ashi. Meranga inyakba den ochi shir kaka asütsü aser iba jenjang nungi atsüngzüka maotsü asoshi laisa shisem. “Asenok koba wadang inyakdir inyakaka, tanü tashi angazüka arubatem dak ano tali bendenloka tejakleni aotsü merangtsüla”, ta laisa ashi.
Tanü asenoki kechi inyakdir iba nung ajemdaker inyakyim ajak nung mongin akümtsü (specialization) merangtsüla aser education ajanga dang meimchir ka taküm jaklaliru aser shisatsü renlokdaktsür asünung, shisatsü tarok bushia aser mapa tasen-tasen bushiteta aser purateta inyaktsü aser iba ajanga meimchir aser lokti kaji nüchi kümdaktsür, ta laisa inyakdaktsünüba o ka lemsatep.
Tanü teburtem atema sobaliba saisapong tetoktepba asem agia liasü; Au jaja, rubberlijak kashishi aser nület tsüngshishi. Au Jajaba nung Alempang Ward pur mezüng aser tanabubaji Yimyu Ward liasü. Rubberlijak kashishiba nung Alempang Ward mezüng aser tanabuba nung Penli Ward liasü. Nület tsüngshishi nung Salangtem Ward mezüng aser Marepkong Ward tanabuba jenjang nung liasü.
Anogo asemnü benjung mapang, sütakmentak, nungdakba osettsüset, naro, teka mapa, chiyungtsü, süngjanglijang, aonsotsü, asayadak tesem, hotel, süoshi aser sobusolemtsü aser ano tapu-tapu ayokba süki balala lapoka alitsü.
Dec 7 nü anepdang 10:00 ako nungi tenzüka tetsürtem ar atsütep tetoktepba ka alitsü aser nikongdang 5:00 ako nungi Aor-Aortsür sempet sayaba kenten sentong ka akatsü renema lir. Iba sentong nung Aor-Aotsür kentener tajung aika arua shilem agitsü, ta osang ajanga angazüker.