Mkg nung auer ka apu; aibelen-sang nem bail magütsütsüla: MCCI

Mokokchung, December 10 (TYO): Mokokchung district administration aser police-i sensotem kümzüka alitsü atema methitemi inyakba atema Mokokchung Chamber of Commerce & Industry (MCCI)-i parnok dang pelar, talisa police-i mask agir mapang shia auyar ka, Imnawapang Jamir, December 9, 2020 nikongdang 5:00 ako meta Mokokchung town Daily Market area nung apuba atema pelar, ta MCCI-i sangdong ka ajanga metetdaktsü.
“Taoba ita nungi tenzüka auyaba tali buluba ajanga Mokokchung nüburtem aser shishilembartem aika takoksa nguogo. Pua alisang ya mapang shia auyar ka lir, anungji pai joko mauyatsü ta shingaia ashitsü makok; pa tepuokdak meyui chiokra ano nübur aser shishilembartem maneni takoksa angutsü,” ta sangdong nung shia lir.
“Aibelensang nem bail magütsütsüla aser ozüng kübok temerenshi tulu agütsütsüla. Pa bail nung chiokra, ibajibo ano maneni aibelendaktsütsü atema pa yariba den kasa züngshitsü, anungji kechi südir süaka pa nem bail magütsütsüla,” ta sangdong nung shia lir.
“Pa ajanga takoksa angurtem nem tekaraba nung temenok agütsütsüla. November 3, 2020 nungi tenzüka pai anogo balala nung dokan tenet nungi sen 2,00,000/- jenjang osettsüset auyaogo. Benjung mongpu aser wara tenokdangbatem nungi maongka agia pai mask agiba dang masü saka tangar dang nungi pilar osettsüset aika shishiba sülen ‘bill’ yangludaktsüdang hire taxi nung khuji oshiketer. Iba sülen anasa ATM nungi sen agizüktsü, ta shia dokanji toktsür aoba sülen gari nungji ajener. Iba osang ya MCCI nem metetdaktsüba sülen aibelensangji aputsü atema tasa ka yanglur atadang December 9 nikongdang pa apu. MCCI-i jelia police nem iba osangji metetdaktsür liasü, ajioda police-i pa apuba sülen tang Police Station-1, Mokokchung nung police ket nung lir,” ta MCCI sangdong ajangasa metetdaktsü.