Mkg nung Biblical Counseling Centre ka lapok

Mokokchung, September 28 (TYO): Mokokchung nung Lydia Ministry-i Biblical Counseling Centre ka lapokogo. Iba centre ya D.C hill leni atuba Mokokchung District Dobashi Welfare Society ki nungto lir.
Lydia Ministry ya 2015 küm July 11 nung tenteta liasü aser iba ministry yagi tongtibangsa Khrista makartem dang Khrista indang angateta ashitsü nükjidong yur tentetba lir.
Tang tashi nung iba ministry nung züngsem 40 lir aser parnoki nüngdakbapur nem counseling balala agütsür, ta Lydia Ministry Director L.Anungba Imchen-i iba centre lapokba sentong nung jembidang metetdaktsü.
Revival sentong aika nung mapang aritepba agi counseling junga magir aser tamanger aikati counseling tetezüji junga memetet. Iba den ano aikati Khrista-ji meteta lir saka mangatet, anungji, nüngdakbapur nem counseling agütsütsü asoshi iba ya tenzüker, ta paisa shisem.
Iba Biblical Counseling Centre ya Brihostibar, Hokolbar aser Honibar anogotem nung lapoktsü aser mapangji anepdang 10:00 ako nungi nikongdang 4:00 ako tashi agitsü. Iba centre nung tejangrar lanu-tain ajak angati arua adentsü akok.
Tanü iba counseling centre meshiteta Mokokchung Town Baptist Arogo (MTBA) Youth Mentor, Limaoneni sarasademtsü. Mokokchung Compound Baptist Arogo Youth Director Lanu-i sarasadema iba sentong tembanga liasü.