Mkg nung BJP senden amen

Farooq Khan-i jembidang tangokba noksa yangi angur.

Mokokchung, June 24 (TYO): Hogulbarnü Nagaland State Bharatiya Janata Party (BJP) Unit pur tanabuba State Executive Meeting yangi Cosmos Hall Mokokchung nung menogo. Tanü iba sentong nung district ajak nungi party ketdangsertem arua shilem tajung agia denogo.
Tanü iba sentong nung National Secretary cum Minority In-Charge & Nagaland In-Charge, Farooq Khan densema pai mapang tatsüka agia jembidang, Nagaland nung BJP party ya nübu majung aser tang asenok ya tazüngla nungi tenzüker asünung, Mission 2018 maparen atemaji ajaki kanga nendaka aser bendanga inyaktsü nüngdaker, ta ashi.
Taruba state election nungji takok angutsü asoshi tashi tait booth level committee balala tentetba den yimtak yimtsüng tashi (grass root level tashi) lua party terayanga inyaktsü asoshi teinyaktsü wadang kar paisa party lenirtem den lemsatep.
BJP-i aniba nüngtugu central sorkari power nung aliba den party nükmen tashi itta alidang, item maongkaji agia Nagaland nung maparen balala tenzüktsüla, ta paisa ayongzüka liasü.
Iba senden nung bangzüng 9 renema ayu. Itemji; mezüngbuba nung, Prime Minister Modi lenisüba kübok NDA sorkari küm ana tashi maparen balala takok ngua inyakba asoshi BJP Nagaland State Unit-i pelaba metetdaktsütsü renem. Tanabuba nung, Nagaland nunga BJP-i aniba sorkar bener arutsü asoshi 2018 election atema meranga inyaktsü bangjemogo.
Tasembuba nung, “Mission 2018” ta ser taruba election nungji nüburtemi imlaba ama sorkar bener arutsü merangba maparen nung BJP nung denertem aser nübur ajungketba mapa inyaktsü asoshi lokti balala nungi tenungiter aser lenirtem ajak pela shishia jaoktsü lemtet.
Pezüngbuba nung, parnoki “Act East Policy” –ji nungiter aser iba sentong dak sentakba nung NDA sorkari nüburtem atema mapatong/sentong balala yanglua akabatemji jungjunga mapa küma inyakba nung nungita yaritsü lemtet.
Pungububa nung, Nagaland nung sanctioned ser aliba mapatong kobasa meinyaki anena lir, tat; four lane road Dimapur-Kohima, National Highway Dimapur-Maram via Jalukie & Peren, foothill road from Khel-Tizit via Dimapur, Niuland, Merapani & Tuli, itemji tekaratiba nung inyaktsü centre sorkar dangi abentsü lemtet. Ano taruba “smart city project” nung Kohima yimtibaa züngokdaktsütsü asoshi benoktsü lemtet.
Trokbuba nung, Naga yimten tebilemtsü ya joko küm 60 shi arur, iba dak sentakba nung ajaki akhümtsübuba aser agizüktetba tatembang telatetba ka dangi arutsü inyakba maparen nungji parnokia nungittsü lemtet. Iba dak sentakba nung BJP-i aniba NDA sorkari mera agia NSCN (IM) den frame work agreement yangluogo, taginüba amaji tatembang kati yakta arutsü imlaba olen ka parnokisa lemsatep.
Tenetbuba nung, linük temzüng nung aliba ama aser NDA-i sangdongba ama, State BJP-ia “secular” inyakyim den maparen ajak nung kati ka akhümtsübutepba nungji nungiter, ta renema ayu.
Tibuba nung, asen loktiliba ajak nung ochimashiba rakdoktsü aser democracy yimsüi melaba ama election timi agitsüba nung parnoki meranger. Tatemsa maparen ajak nung; “together with all, development of all” omen nung rangloker aoba nung parnoki amanger, ta renema yuogo.
Tanü iba kasa sentong nung State President Visasolie Lhoungu, Adviser Dr. T.M Lotha, Adviser Imtilemba Sangtam, Vice President Er. Senkathung Jami, Vice President K James Vizo, Spokesperson Yanghose nungertemia o tatsütsü jembia liasü.