Mkg nung cable TV agütsüba ‘Headend’ kol ka amenok

Mokokchung, Monupii (May) 7 (TYO): Hornbill Media Private Limited (HMPL) ajanga Mokokchung nung cable television agütsüba kol ‘Headend’ ka amenokogo. Hornbill Media Pvt. Lt. ya Mokokchung Channel, Global Chapter Dimapur aser Symbiosis Dimapur parnoki longjemer tentetba telok ka lir.
Mkg nung iba ‘Headend’ kol amenokba ajanga taoba mapang Dimapur nungi TV channel balala bena/agia aliba joko item channel-temji Mkg nungi dang indang-indanga tagir (subscriber) nem agütsütsü, iba kol amenokba ajanga taoba mapang dang nungi TV channel talila kar agütsüsemtsü, ano osangtajung kaji; iba ya ajanga HD channel-a kar agütsütsü, ta Mkg Channel kibur, I. Temsü Jamir aser Global Chapter kibur Lanu Lkr nati osangbener den jembidang metetdaktsü.
Iba kol ya amenokba ajanga meilongi HD channel semer (30) dak tali agütsütsü. Cable TV nung HD channel agütsübaji Mkg nungbo ibai mezüngbuba asütsü, ta HMPL ketdangsertemi ashi. Ita ishika lir külen ano ‘Pre-paid facility’ agütsütsü tebilemba lir, ta parnokisa shisem.
Mkg nung iba ‘Headend’ kol amenokba ya tongtibangsa nübur nem service tajungtiba agütsütsü nükjidong yur bener aruba lir, ta HMPL ketdangsertemisa lemsatep.
Mokokchung Town Baptist Arogo (MTBA), Asso. Pastor, Yangluba-i iba kol tasenba meshiteta aser moaja sarasademja liasü.