Mkg nung Chang nunger Poang Lüm benjong longsotepa amung

Mokokchung, Jan 12 (TYO): Mokokchung Chang Union-i ayongzüka “Poang Lüm” benjong MCU kimen Saoyang Imlong’er kidang anükabang densema longsotepa mungogo.
Iba sentong nung tsürabur Wb. Thongo Imlong-i mapang tatsüka agia jembidang, ibai tamangba yimsü anema masü, saka alima nung pelaa aser lungjema putepa alitsü asoshi iba ama benjong ya amungtsüla, ta ashi.
Wb. N.Sachingba-i ‘Poang Lüm’ benjong teratet lemsatepdang, akhi tsürabur aluyimba mapang mei piyong rongsen bushia bendena arur külen tsüngküm nung iba benjong ya munga aru. Iba mapang kinünger, adianu aser yimertem tsüngda kati ka den tali metettepa tesendaktep yanglushi. Tanupurtemi tama taintem nem shijep agütsütsü aser taintemia tanurpur nem meyiptsütsü ta kati ka tushitepa amungba benjong ka lir, ta ashi.
Kasa sentong nung anükabang Col. R.S Walia, Wb. M.N Siba, Wb. Makum, Wb. Shatmai parnoki tarur pelaa agizükba den tepela o, tayongzükba o aser anküp o balala jembi. Tetsür telok kati Poang Lüm benjong munger ayongzüka sobaliba ken tajung ka aten. Sentong nung adenertem ajak shilem agia benjong ken aser yar tsüngsangtepa liasü.
Iba sentong Chang Baptist Church Mokokchung pastor Ngaku den temoatsü meshia sarasademer tenzük aser CBCM Asso. Pastor (W) Limanungla den tenüngsang agüja sarasademer tembang.