Mkg nung chiyongtsü tendangba lab amenoktsü mepeshir

Dimapur, Rongjui/September 23 (TYO): Nüburtem ajangzüktsü mechi Mokokchung nung chiyongtsü tendangba lab ka amenoktsütsü asoshi Mokokchung Chamber of Commerce & Industry (MCCI)-i department of Health and Family Welfare, Government of Nagaland dang mepeshiogo.
Mokokchung nung chiyongtsü tendangba lab maliba ajanga nüburtem aser shishilembartem mapang shia timtem ajurur aser talisa jongdak mapang timtem tali ajurur. Maneni shishilembadak chiyongtsü kanga bulua angubatem Food Safety and Standards Authority of India (FSSAI)-i latettsüba inyakyim metongi alitsü akok saka Mokokchung nung chiyongtsü tendangba lab maliba ajanga metendangteti alitsü akok.
Kasa mapang nung local shishilembartem shirnok chiyongtsü dak sendakba nung shishilembar, parnoka kasa kuli ajanga parnoki yanglutetba chiyongtsütem metendangi dang ayoktsüsa akümer.
MCCI-isa ashiba agi, Mokokchung nung chiyongtsü tendangba lab amenokba ajanga mokokchung district dang masü saka Tuensang, Zunheboto, Longleng aser Mon amala kidanger district tem ajangzüktsü.
Lenla ajak nungi asadanger ajak ajangzüktsü mechi Mokokchung nung chiyongtsü tendangba lab ka amenoktsü ya kanga tongtibang ta MCCI-i angateter.
Iba dak sendakba nung MCCI-i sorkar nem takok tashi teyari agütsütsü asoshi renema aliba kasa sangdong ajanga metetdaktsüogo.
Maneni Mokokchung District Planning and Development Board-ia Mokokchung nung chiyongtsü tendangba lab lapoktsü nüngdakba reprangtetba atema parnok dang pelaba lemsatepba den, iba lab ya takaratiba nung amenoktsü imlaba, MCCI tir Tsukti Longkumer-i aser General Secretary Limalenden Longkumer nati lemsatepa liasü.