Mkg nung chiyungtsü teraksa ayokba atema tebilemtsü akar: MTLT

Mokokchung, Rongchii (April) 19 (TYO): Mokokchung jila nung dokantem nung chiyungtsü mapang talangka süir teraksa ayokba, talisa taseptsü nung aliba chiyungtsü tamajung ayokba atema Mokokchung Town Lanur Telongjem (MTLT)-i kanga tebilemtsü akar, ta tanü MTLT Grievances Cell züngsem, Temsu Kichu aser MTLT tatong Tir, Martoshi Longkumer nati sangdong ka ajanga metetdaktsü.
“Tai maket talirtemi mapang talangka süir aliba chiyungtsütem alishiba osang MTLT nem metetdakja arudarr, yamaji dokan kiburtemi memeteti mesüra metetsümonga chiyungtsü mapang talangka süir aliba ayokba MTLT züngsemtemia ajangshiogo,” ta sangdong nung shia lir.
Mokokchung jila nung aliba nüburtemi lijaliyongbaren indang junga rajema lir, ajisüaka yimtsüngtem aser jila anasa aliba shishilembartemi peipei tesem nung ayoktsü atema chiyungtsü khenyongi aika alizüka ayur, aser tai maket nüburtemi meteta mesüra memeteti mapang kanga süia ayuba chiuyungtsü alia achiba ajanga temang nung kongshiba atema MTLT-i tebilemtsü akar, ta parnokisa mettdaktsü.
Anungji item kuli nung ajemdaker MTLT-i Mokokchung ADC (Mokokchung Municipal Council Administrator) dang shidi ka ajanga ibaji reprangshir tapet mera agia inyaktsü atema mepishiogo, ta parnokisa metetdaktsü.
“Nija, telok mesüra sorkar agency balala atema tongtibangtiba tebilemtsüji nüburtem anema-alibaren jenjang lir, ta MTLT-i angateta lir. Nüburtem temang nung timtem adokbaji mapang talangka süir ayokba chiyungtsütem ajanga lir, aser ibaji zübazülema medoktsütsüla. Ketdangsertemi item ama tim masüba mapatem atema meinyakra ibajibo magizüktettsü,” ta MTLT-i metetdaktsü.
Mokokchung Municipal Council (MMC)-i iba tebilemtsü onük süoki ia agitsü imlar, iba den külemi nübur aser shishilembartem nem iba jenjangji angatetdaktsütsü ta MTLT-i amanger, ta parnokisa ashi.
Tesüiba ita ana tsüngda jila nung item ama tashishiba osang aika MTLT-i nguogo, anungji MTLT-i talirtem aser lokti lenir ka ama item ama tesüiba chiyungtsü tamajung ayokba mita reprangtsü, ta parnokisa metetdaktsü.
Ano külen MTLT-i nüburtem danga chiyungtsü aser mozümora lijaliyongba mapang nung manufacture date aser expiry dates (mesüra best before dates) repranger ang alitsü metetdaktsü.