Mkg nung Community Mobilization & Training agi

Dimapur, Aami/June 11 (TYO): District Mission Authority, SSA, Mokokchung-i ayongzüka Sub-Divisional Education Officer (SDEO), Mokokchung kübok Community Mobilization & Training sentong ka Mokokchung Town Hall nung June 11 nü agiogo.
Sentong nung o jembidang SDO (C), Mokokchung, Abhinav Shivam-i sentepa aliba nüburtem dang temelenshi bener arutsü asoshi hadir kaka akümtsü ayongzük. Lokti nung temelenshi bener arutsü atema Education ya kanga tongtibang lir ta shia Abhinav-i, “lokti melenshitsü süra asenok sasa educate asütsüla,” ta ashi.
Paisa, school aika nung kaketshirtem sensaker kibongtem nungi lir anungji item tanurtem nem shisatsü agütsür aser len sayurtemi parnok ya pei tanur ama benshitsüla, ta ashi. Asenoki tanurtem anepaluba ajanga loktia anepalur, ta Abhinav-i ashi. Paisa, asenoki tanurtem tamakok ngudaktsüra humanity tamakok ajurudaktsür aser asen tinyaktsü nung tamakok angur, ta ashi.
Sentong tembang sülen technical session agi, kong mezüngbuba session nung Re-constitution of SMC/WEC dak rangloker Right to Education, Account maintenance & Record keeping, Inclusive Education onük lemsatepa liasü. Tanabuba session nung Midday Meal, Learning Outcome & NAS 2017, OoSC/Residential Hostel aser UDISE & SDMIS onük nung tangazükba balala agütsü aser iba sülen sensaksem agia liasü, ta ketdangser sangdong ka ajanga metetdaktsü.