Mkg nung Dec 20-22 tashi “Christmas Night Carnival” ayonger

Mokokchung, Luchii/December 07 (TYO): Adventure and Motorsports Association Mokokchung (AMAM) aser Mokokchung District Musicians’ Association (MDMA) den külemi yaritepa Mokokchung Municipal Council (MMC)-i mezüngbuba “Christmas Night Carnival” ta sür sentong ka Luchii/December 20 nungi December 22 tashiji Mokokchung town nung ayongzüka agitsü renema lir, ta tanü Mokokchung ADC aser MMC Administrator, Manpai Phom, NCS-i pa indang taktang nung osangbener senden ka nung metetdaktsü.
Iba carnival sentong ya All Ward Union Mokokchung aser Mokokchung Chamber of Commerce and Industries (MCCI)-ia nungita yariteptsü. Iba sentong ya tongtibangsa Khristmas mongpu tali lemlemdaktsütsü aser nüburtem nem aonung mapang jangratem bener arutsütsü nükjidong nung ayongzüker, ta Manpai-i ashi.
Night Carnival nungji; chiyungtsü tapu balala ayokba, asaya tapu balala asayadak, kentendak music booth, noksa tangoktsü atema photo booth aser ano tapu balala alitsü aser item ajakji ozüng ka kübok (under strict guidelines) inyaksangshitsü, ta paisa metetdaktsü.
Aji oda, stalls kecha nunga temesepba chiyungtsü mesüra ibala mesükba ozüngi memelaba kecha mamshidaktsütsü, ta paisa shisem.
Iba carnival ya Town tiyong (Police Point) nungi Mokokchung Rotary Club building tesem tashi nung akatsü aser ibaji aonung 6:00 ako nungi 9:00 ako tashi dang alitsü.
Kari danga night carnival dak sentakba nung osang tejangjaba metetnüra item mobile number-tem nung (7005617266/9089959103) tongteprateptsü akok, ta kasa osang ajangasa metetdaktsüogo.